Նոր օրենքի համաձայն՝ բանակ են գնում ծառայելու այն ուսանողները, որոնք ընդունվում են բուհ և սովորում են ոչ անվճար համակարգում: Իսկ ՊՆ-ի և ուսխորհուրդների առաջ խնդիր է դրված ապագա զորակոչիկներին ծանոթացնել մեր իրական` հոգևոր, հայրենասիրական և պատմամշակութային արժեքներին: Միջոցառումների շրջանակներում նախատեսված է այցելություններ զորակոչիկներին, ինչպես նաև այցելություններ Սարդարապատ, «Մայր Հայաստան» հուշարձաններ, ինչպես նաև «Եռաբլուր» զինվորական պանթեոն: Բացի այդ, Հանրային խորհրդի հետ համատեղ ՈՒԽ նախագահները որոշել են զորամասերում հայոց լեզվի, պատմության և օտար լեզուների ուսուցում կազմակերպել: Այս մասին այսօր լրագրողների հետ հանդիպման ժամանակ 14 պետական և ոչ պետական բուհերի անունից հայտարարեցին Երևանի թատրոնի և կինոյի պետական ինստիտուտի ուսխորհրդի նախագահ Էմին Թորոսյանը, Ռուս-հայկական սլավոնական համալսարանի ուսումնադաստիարակչական բաժնի վարիչ Հռիփսիմե Մարգարյանը, Հայաստանի պետական ագրարային համալսարանի ուսխորհրդի նախագահ Ռոբերտ Մակարյանը և «Անկախության սերունդ» երիտասարդական կազմակերպության նախագահ Տիգրան Սաֆարյանը: Մեր հարցին ի պատասխան, թե՝ ո՞վ է հովանավորում ծրագիրը, Էմին Թորոսյանը ասաց, որ ՀՀ ՊՆ-ն պատրաստակամություն է հայտնել 100 տոկոսով ապահովել, սակայն, ուսխորհրդի առաջարկությամբ, գեղարվեստական և տեխնիկական մասը բուհերը կապահովեն: Թեև արդեն սկսվել է աշնանային զորակոչը, սակայն ՈՒԽ նախագահները չկարողացան ասել, թե կոնկերտ ե՞րբ կմեկնարկի իրենց ծրագիրը: