Հայաստանը չի կարող ունենալ միջուկային զենք, դա բացառվում է թե՛ գործնականում և թե՛ տեսականորեն: Ռուսաստանցի ռազմական փորձագետ Ալեքսանդր Խրամչիխինը այսպես մեկնաբանեց ամերիկյան The National Interest պարբերականի հոդվածը, որում փորձագետ Սեբաստիեն Ռոբլինը կարծիք էր հայտնել, թե Հայաստանը կարող է միջուկային մարտագլխիկներ ստեղծել Ռուսաստանից ստացած «Իսկանդեր» օպերատիվ-մարտավարական հրթիռային համակարգերի համար:
Ընդհանրապես ռազմական գործի մասնագետներն ասում են, որ գերհզոր «Իսկանդեր» համալիրները, որոնք թիրախներ են խոցում մի քանի հարյուր կմ հեռավորության վրա, կարող են կրել նաև միջուկային մարտագլխիկներ, բայց Ալեքսանդր Խրամչիխինի խոսքով՝ այդպիսի հնարավորություն ունի միայն այդ զենքն արտադրող երկիրը՝ Ռուսաստանը:
«Դա միանշանակ բացառվում է: Հնարավոր չէ, որ Ռուսաստանը ինչ-որ մի երկրի վաճառի կամ տրամադրի միջուկային մարտագլխիկներ, նման բան չի կարող լինել ոչ մի դեպքում, իսկ Հայաստանը, իմ կարծիքով, այդպիսի տեխնոլոգիական հնարավորություններ չունի, և բացի այդ՝ ոչ ոք նրան թույլ չի տա դա անել թե՛ ռազմական և թե՛ քաղաքական իմաստով, քանի որ դա պահանջում է հսկայական ծախսեր, տարատեսակ նյութերի և տեխնոլոգիաների ձեռք բերում, ինչը հնարավոր չէ թաքցնել»,- «Առաջին լրատվական»-ի հետ զրույցում նշեց Խրամչիխինը:
Մերձավոր Արևելքի և Կովկասի հարցերի փորձագետ Ստանիսլավ Տարասովը կարծում է, որ Ռոբլինի հոդվածն ընդամենը «տեղեկատվական փուչիկ է», իսկ պատվիրատուն, ամենայն հավանականությամբ, Ադրբեջանն է:
«Դա տեղեկատվական փուչիկ է: Ներեցեք, Հայաստանի ինչի՞ն է պետք միջուկային զենքը: Հայաստանին իր խնդիրներն էլ հերիք են, և հետո Հայաստանը Ռուսաստանի դաշնակիցն է, Ռուսաստանը միջուկային տերություն է: Ռուսաստանում միջուկային զենքի ստեղծմամբ զբաղվող մասնագետները գիտեն բոլոր նրբերանգները և ընդհատակյա հոսանքները՝ կապված այդ հարցի հետ:
Այդ տեղեկությունները հրապարակ են նետվում որոշակի նպատակներով, դա Հայաստանի և Ադրբեջանի միջև տեղեկատվական պատերազմի տարրերից մեկն է: Հայաստանում հայտնվեցին «Իսկանդեր» համակարգեր, ստեղծվեց միացյալ զորախումբ, և նրանք հասկանում են, որ ռազմական գործոնը աստիճանաբար չեզոքացվում է, այստեղից էլ գալիս է ադրբեջանցիների անհանգստությունը: Նրանք փորձում են սլաքները ուղղել Հայաստանի վրա, թե իբր Հայաստանը սպառնում է տարածաշրջանի անվտանգությանը. մի ժամանակ նրանք աղաղակում էին ի լուր աշխարհի, թե Մեծամորի ատոմակայանը սպառնալիք է ներկայացնում տարածաշրջանի համար, հիմա կեղծ լուրեր են տարածում, թե իբր Հայաստանը միջուկային զենք է ստեղծում:
Պարզ է, թե որտեղից են գալիս այդ լուրերը, դրանք պատվիրված նյութեր են, որոնց արմատները Բաքվում են: Որպեսզի Հայաստանը կարողանա ստեղծել ատոմային զենք, ինչպես Իրանն է անում, պիտի իր բյուջեն 1000 անգամ ավելացնի, հասկանո՞ւմ եք, դա լիակատար հիմարություն է»,- «Առաջին լրատվական»-ի հետ զրույցում նշեց Տարասովը:
