Կինոռեժիսոր Տիգրան Խզմալյանը ամիսներ առաջ հայտարարել էր «Եվրոպական ընտրություն» պայմանական անվանմամբ կուսակցություն ստեղծելու իր մտադրության մասին։ Խզմալյանն ընդգծել էր, որ ակտիվ քննարկումներ է անկացնում այն ուժերի, գործիչների հետ, որոնք Հայաստանի ապագան տեսնում են Եվրոպայի հետ գործակցությամբ՝ թե՛ քաղաքական, թե՛ տնտեսական, և թե՛ ռազմական ուղղություններով։
Խզմալյանի այս նախաձեռնությանը իր աջակցությունն էր հայտնել նաև ՀՀՇ նախկին անդամ Կարապետ Ռուբինյանը, ով մեզ հետ զրույցում նշել էր, որ թեպետ ինքը ՀՀՇ-ից հետո իրեն այլ կուսակցությունում չի պատկերացնում, բայց Խզմալյանի գաղափարները կիսում է, և պատրաստ է ուժերի ներածին չափով աջակցել։
Այսօր, սակայն Տիգրան Խզմալյանը «Առաջին լրատվական»-ի հետ զրույցում նշեց, որ կուսակցությունների մասին նոր օրենքն իրեն գցել է անորոշության մեջ, և հնարավոր է կուսակցության փոխարեն, առայժմ հանդես գան հասարակական կազմակերպության կամ շարժման տեսքով։
Հիշեցնենք, որ խորհրդարանական ընտրություններին ընդառաջ Ազգային ժողովը պատրաստվում է քննարկել մի նախագիծ, ըստ որի կուսակցություն գրանցելու համար անհրաժեշտ է առնվազն 1000 անդամ՝ նախկին 200-ի փոխարեն։
«Գործող օրենքով կուսակցություն հնարավոր էր ստեղծել և մենք կարողացանք ապահովել այդ թիվը։ Սակայն հիմա նախատեսվում է նիշը բարձրացնել մինչև 1000-ը։ Ես պետք է քննարկեմ իմ համախոհների հետ, և եթե դա ընդունվի, մենք կշարունակենք մեր գործունեությունը՝ առայժմ որպես ՀԿ կամ պարզապես որպես նախաձեռնություն։ Ես չեմ ուզում ասել՝ դա անարդար է կամ միտում տեսնել, կա իհարկե տրամաբանություն, բայց տարօրինակ է, որ ընտրություններից առաջ է քննարկվում։ Պետք է ընդունել դա որպես իրողություն, և եթե այդ որոշումն ընդունվի՝ մեր ծրագրերը հնարավոր է փոխվեն»։
Դիտարկմանը, թե փաստորեն խնդիրն այն է, որ չեն կարողանա ապահովել այդ 1000 մարդուն, Տիգրան Խզմալյանն արձագանքեց. «Ես հիմա ներքին ռեսուրսներ չունեմ հավաքագրելու 5 անգամ ավել մարդ, որովհետև մենք փորձում ենք ընդգրկել ոչ միայն համոզված եվրոպամետ մարդկանց, այլև նրանց, ովքեր պատրաստ են իսկապես աշխատել և ոչ թե ֆեյսբուքի լայքով սահմանափակել իրենց ակտիվությունը»։
Հետաքրքրվեցինք, այդ դեպքում կարո՞ղ է ընտրություններին ընդառաջ գործակցել իր գաղափարակից ԱԻՄ առաջնոդ Պարույր Հայրիկյանի հետ, ով ավելի վաղ հայտարարել էր, որ պատրաստ է լայն գործակցության. «Միանշանակ։ Ոչ միայն իր հետ, իհարկե՝ նախևառաջ Հայրիկյանի հետ, որովհետև նա մեզ համար եղել է քաղաքականության արևմտյան չափանիշ։ Կգործակցենք այն ուժերի հետ, ովքեր կգիտակցեն, թե որտեղ է գտնվում Հայաստանի իրական փրկությունը»,- եզրափակեց Տիգրան Խզմալյանը։
Լուսանկարը՝ Photolure-ի
