Հայաստանում Ֆրանսիայի դեսպանատանը նոյեմբերի 17-ին նշվեց Air France ավիաընկերության Փարիզ-Երևան-Փարիզ չվերթի հոբելյանական տասներորդ տարեդարձը՝ ֆրանսիական Բոժոլե Նուվո գինու տոնակատարությամբ։
Air France-ի Փարիզ-Երևան առաջին չվերթն իրականացվել է 2006թ-ի ապրիլի 8-ին, իսկ առաջին չվերթի պատվավոր հյուրն է եղել աշխարհահռչակ հայազգի շանսոնիե Շառլ Ազնավուրը, ինչպես նաև հասարակական-քաղաքական տարբեր գործիչներ ու գործարար աշխարհի ներկայացուցիչներ։
Եվրոպական խոշորագույն ավիաընկերության կողմից առաջարկված երթուղիների լայն ցանցի շնորհիվ՝ նոր հնարավորություններ ստեղծվեցին ոչ միայն հայաստանցիների, այլև աշխարհով մեկ սփռված հայության համար։
«Մեր իրականության մեջ Փարիզ-Երևան առաջին թռիչքը շատ կարևոր իրադարձություն ու նշաձող էր։ Տասը տարի է արդեն, որ մենք թռիչքներ ենք իրականացնում դեպի Երևան, Երևանից դեպի Փարիզ։ Բացի այդ մեծ ցանց է գործում նաև աշխարհի տարբեր ուղղություններով»,-Հայաստանում Ֆրանսիայի դեսպանատանը կայացած մամուլի ասուլիսի ընթացքում նշեց Air France –KLM-ի տարածաշրջանային մենեջեր Ֆրանկ Վան ‘ տ Հոֆը։
Այս կապակցությամբ վերջինս նաև հավելեց. «Շատ կարևոր է նաև այն, որ մենք կարողանում ենք մեծ ներդրումներ անել մեր արտադրանքի մեջ, թարմացնել ամբողջ շարժակազմը, բարելավել նաև սնունդը ինքնաթիռներում»։
Այսօր ավիաուղին դեպի Երեւան իրականացնում է շաբաթական չորս չվերթ ամառային եւ երկու չվերթ ձմեռային չվացուցակով:
Հայաստանում Air France-ի վաճառքի գլխավոր գործակալ Executive Travel գործակալության նախագահ Լևոն Բաղդասարյանը «Առաջին լրատվական»-ի հետ զրույցում տեղեկացրեց, որ այս տարիների ընթացքում բարելավվել է ոչ միայն ծառայությունների մատուցման որակը, այլև ավելացել է չվերթների հաճախականությունը։
«Մենք կամաց-կամաց փորձում ենք մի քանի տարվա ընթացքում ամենօրյա չվերթներ ունենալ Երևան –Փարիզ մայրաքաղաքաների միջև»,-շեշտեց Լևոն Բաղդասարյանը՝ միևնույն ժամանակ նկատելով, որ իրենց համար դա մեծ առաջընթաց է։
Անդրադառնալով սպասարկման որակին՝ Լևոն Բաղդասարյանը նկատեց, որ այս ասպարեզում ևս մեծ առաջընթաց է գրանցվել։ Նա մանրամասնեց. «Սննդի որակն է շատ բարելավվել, նստատեղերի հարմարավետությունն է բարձրացվել, հին ինքնաթիռները փոխարինվել են նորերով»։
Ուղևորների ակտիվությունն ինչպե՞ս եք գնահատում, շա՞տ են ուղևորները, ովքեր նախընտրում են Երևան-Փարիզ-Երևան ուղղությունով թռչել և ի՞նչ գնային քաղաքականություն է սահմանված,-հետաքրքրվեցինք Լևոն Բաղդասարյանից։
«Այո, իհարկե, ուղևորները շատ-շատ են, բայց չպետք է սահմանափակվենք միայն Փարիզ-Երևան ուղղությունով։ Մենք բավականաչափ ուղևորներ ունենք Կանադայից, ԱՄՆ-ից, Հարավային Ամերիկայից, ինչպես նաև Եվրոպայի բոլոր քաղաքներից»։
Լևոն Բաղդասարյանի խոսքով՝ ողջ Եվրոպայում մեծ հետաքրքրություն կա Հայաստանի նկատմամբ, ինչը, նրա գնահատմամբ, պայմանավորված է նաև հայ-ֆրանսիական դարավոր բարեկամական հարաբերություններով։
Այս տարիների ընթացքում Air France-ը սպասարկել է ավելի քան 500 հազար ուղևորի՝ իր ուրույն տեղը գտնելով Հայաստանի ավիացիոն շուկայում։
Հայաստանում Ֆրանսիայի դեսպան Ժան- Ֆրանսուա Շարպանտիեն էլ իր հերթին վստահեցրեց, որ ինքն անձամբ օգտվում է այս ավիաընկերության մատուցած ծառայություններից, սակայն պատճառը ոչ միայն ազգասիրությունն է, այլեւ տվյալ ընկերության բարձրորակ սպասարկումը։
Համաշխարհային ավիացիայի առաջատար այս ավիաընկերությունը հիմնադրվել է 1933թ-ին։ 2004թ-ին կազմավորվել է Air France-KLM խումբը, որն այժմ իրականացնում է օրական 2200 չվերթ աշխարհով մեկ՝ իր 352 օդանավերի միջոցով։ Խումբն առաջարկում է չվերթներ 320 ուղղություններով դեպի աշխարհի 114 երկիր։
Նշենք նաև, որ այս տարի Բոժոլե Նուվո գինու տոնակատարությունը հնարավոր դարձավ իրականացնել Air France ավիաընկերության հայաստանյան ներկայացուցչության աջակցության շնորհիվ։
