Հայաստանի ֆուտբոլի ազգային թիմի ավագ Հենրիխ Մխիթարյանի խոսքով՝ ինքը շարունակելու է պայքարել «Մանչեստեր Յունայթեդ»-ի կազմում տեղ գտնելու համար:
«Վերջին անգամ խաղադաշտում եղել եմ մեկ շաբաթ առաջ «Ֆեներբահչե»-ի հետ խաղում, 30 րոպե: Բայց դա դեր չի խաղում, և եթե ֆուտբոլիստն ունի ցանկություն, ապա մարզավիճակը մղվում է երկրորդ պլան: Փորձելու եմ ամեն ինչ անել, որ հավաքականին օգտակար լինեմ: Անգլիայում ամեն ինչ շատ լավ է՝ չնայած քիչ խաղաժամանակ ստանալուս: Շատ երկար ճանապարհ եմ անցել, որ հասնեմ այնտեղ: Ոչինչ չի կարող խանգարել ինձ երազանքս իրականացնելու համար: Եթե հիմա հանձնվեմ, ապա կստացվի, որ ոչինչ չեմ արել ու ոչնչի չեմ հասել: Իմ մեջ ուժ եմ գտնելու և պայքարելու եմ ստեղծված իրավիճակից դուրս գալու համար»,-լրագրողների հետ հանդիպման ժամանակ ասաց Մխիթարյանը:
Հայաստանի ազգային թիմի առաջատարը սեպտեմբերի 10-ից հետո, միայն նախորդ շաբաթ մասնակցեց «Ֆեներբահչե»-«Մանչեստեր Յունայթեդ» խաղին, այն էլ փոխարինման դուրս գալով խաղի 60-րդ րոպեին: