«Առաջին լրատվական»-ը ղարաբաղյան հակամարտության կարգավորման վերջին զարգացումների շուրջ զրուցեց միջազգային վերլուծաբան Ռուբեն Մեհրաբյանի և ԱԺ պատգամավոր, միջազգայնագետ Շիրակ Թորոսյանի հետ: Անդրադարձ կատարվեց նաև Թուրքիայի ԱԳ նախարար Մ. Չավուշօղլուի հայտարարությանը այն մասին, որ Ռուսաստանը Թուրքիայի հետ քննարկել է հինգ շրջանների վերադարձի հարցը, և որ դրանց վերադարձի դեպքում խնդիրը կկարգավորվի: Փաստորեն Ռուսաստանի առաջարկը հնչեցվել է Թուրքիայի կողմից: Սա կարծես թե նշանակում է, որ Ռուսաստանը փորձում է Թուրքիային նույնպես մասնակից դարձնել ղարաբաղյան հակամարտության կարգավորման գործում:
«Նորություն չէ այն, որ Ռուսասատանը մշտապես ցանկացել է Մինսկի խմբի շրջանակներում տարվող գործընթացը դուրս բերել այդ հովանուց և տանել ռուս-թուրքական և ռուս-ադրբեջանական գործարքի հարթություն: Թուրքիան դրան երբեք դեմ չի եղել: Դրան գալիս է լրացնելու Չավուշօղլուի չափազանց կարևոր հայտարարությունը, ընդ որում՝ նա նաև ասել է, որ այդ հարցում նրանք Ռուսաստանի հետ պայմանավորվել են: Եվ զարմանալի չէ նաև, որ Ռուսաստանի արտգործնախարար Լավրովը դա չհերքեց, խուսափեց պատասխանից:
Սա չափազանց լուրջ ազդակ պետք է լինի հայկական դիվանագիտության համար, որպեսզի նորից «գույքագրի», թե ղարաբաղյան կարգավորման գործընթացում հայկական դիվանագիտության դաշնակիցներն ովքեր են, հակառակորդներն ովքեր են, և որն է Ռուսաստանի դերը: Ռուսաստանն այստեղ խաղում է երկդիմի խաղ»,- նշեց Ռուբեն Մեհրաբյան:
«Թուրքիայի վարքագիծը բոլորիս քաջ ծանոթ է, Թուրքիան իր դեմքը ցույց տվեց, երբ որ չվավերացրեց հայտնի արձանագրությունները՝ առաջ քաշելով ղարաբաղյան նախապայմանը: Նախապայմաններ պետք է չլինեին, և հայ-թուրքական հարաբերությունները պետք է կարգավորվեին առանց Ղարաբաղի: Շրջափակամամբ, Ադրբեջանին աջակցելով, հրապարակային հայտարարություններով և վարքագծի մի շարք դրսևորումներով Թուրքիան ապացուցում է, որ շահագրգիռ կողմ է և անուղղակիորեն կա այդ կոնֆլիկտի կարգավորման գործընթացում:
Բայց մեր դիվանագիտությունը անում է ամեն ինչ, որ Թուրքիայի ներգրավումը բացառվի, և փառք Աստծո, դա ստացվում է: Եթե կա շահագրգիռ կողմ, ապա նա չի կարող հակամարտության կարգավավորման վրա, մեղմ ասած, դրական ազդեցություն ունենալ»,- նշեց Շիրակ Թորոսյանը:
Մանրամասները՝ տեսանյութում:
