«Եկեք մի քիչ լայն նայենք ամեն ինչին։ Տեսնենք՝ ինչ տեղի ունեցավ ապրիլին ու ամռանը հետո՝ աշնանը փոխվեց կառավարության հիմնական կազմը, իսկ ՌԴ-ն մեծ դերակատարություն ունի այստեղ: Խնդիր կա ՀՀ-ում վերահսկելու ընդդիմադիր ժողովրդի կարծիքը, խնդիր կա մեղմելու ատելությունն ու տնտեսական ճգնաժամը, դրա համար լրացուցիչ ուժեր ներգրավելու խնդիր կա»,- ԱԺ ճեպազրույցների ժամին այս մասին ասաց« Ժառանգություն» խմբակցության պատգամավոր Զարուհի Փոստանջյանը՝ անդրադառնալով Գ. Ծառուկյանի հնարավոր վերադարձին:
Զարուհի Փոստանջյանն անդրադառնալով ընդդիմադիր դաշտի միավորման կոչերին՝ հարց հնչեցրեց, թե ընդդեմ ինչի՞ միանալ: «Հայտարարվում է՝ միանալ, որպեսզի տեղի ունենա իշխանափոխություն: Իշխանափոխություն, բայց իշխանության ո՞ր ուժն է գալիս… Խնդիրն այն չէ, որ անձինք փոխվեն, հիմա վարչապետի անուն-ազգանունը, դեմքը փոխվել է, բայց էությունը մնացել է նույնը: Հարցն այն է, որ եթե մենք դեմ ենք, ապա ինչի՞ն ենք դեմ»:
Զ. Փոստանջյանի խոսքով՝ ծրագրերով պետք է խոսել. «Եթե շարունակում են մնալ ԵՏՄ կազմում, Թուրքիայի և Իրանի սահմանին ՌԴ զորքերի առկայությանը կողմ լինել, հավանություն տալ ռուսական ռազմաբազայի առկայությանը առանց համապատասխան հատուցման, եթե շարունակելու են արցախապատկան տարածքների հանձնմանը կողմ լինել…, սրանք պետք է հիմք հանդիսանան, և սրանց դեմ պետք է համախմբվել»:
Մանրամասները՝ տեսանյութում: