ՀՅԴ խմբակցության ղեկավար Արմեն Ռուստամյանն այսօր ԱԺ ճեպազրույցների ժամանակ, անդրադառնալով Գագիկ Ծառուկյանի քաղաքականություն վերադառնալու վերաբերյալ հարցին, նշեց, որ քաղաքականության մեջ ոչինչ բացառել պետք չէ. «Նախ ես չեմ բացառում, որ նման բան կկատարվի, Հարվարդ պետք չի ավարտել, որ հասկանաս, որ եթե դու չես զբաղվում քաղաքականությամբ, քաղաքականությունը, միևնույնն է, զբաղվում է քեզնով, այն էլ այն ֆոնի վրա, երբ մենք գնում ենք փոփոխությունների, ու քաղաքական դաշտն ակտիվանում է»:
ՀՅԴ պատգամավորը նշեց, որ իրենք Գագիկ Ծառուկյանի հետ աշխատելու փորձ ունեն ու խնդիր չեն տեսնում: «Իր մոտեցումը, որ երկրում փոփոխություններ տեղի ունենան առանց արյան, ամենալավ մոտեցումն է: Քաղաքական այն տրամաբանությունը, որ ընթացքի մեջ է դրված Հայաստանում, շատերին է ստիպելու ակտիվանալ, որովհետև կողմ քաշվելը սխալ է, պիտի այնպես անել, որ այդ պրոցեսները, որ ընթանում են հիմա, դրական լինեն, արդյունք տան, մեր երկիրը դրա կարիքն ունի»,- հավելեց Ա. Ռուստամյանը:
Անդրադառնալով հարցին, թե քաղաքական դաշտն ո՞ւնի Ծառուկյանի կարիքը, Արմեն Ռուստամյանը պատասխանեց, թե նրա կարիքն ունի իր շրջապատը, այն մարդիկ, ում նա բարեգործությամբ փորձում է օգնել: Ռուստամյանը հիշեցրեց, որ ՀՅԴ-ն ողջունել է, երբ ԲՀԿ նախկին ղեկավարը հեռացավ, որպեսզի արյուն չթափվի, քանի որ այն ժամանակ պարզ էր, որ բախումներն անխուսափելի կլինեն: «Հայաստանում այնքան ծալած էջեր են բացվել, որևէ զարմանալի բան չի կարող լինել, եթե էջերը բացվեն»,- նշեց նա:
Արդյո՞ք իշխանության հետ համաձայնեցված է նրա վերադարձը, այս հարցին ի պատասխան Արմեն Ռուստամյանը նշեց. «Մեզ հետ հաստատ համաձայնեցված չէ, ինչի՞ պիտի համապատասխանեցվի ընդհանրապես, մարդն ազատ է»:
Մանրամասները՝ տեսանյութում:
