Ոճրագործությունից անցել է 17 տարի, բայց մենք այդ գործի մասին գիտենք այնքան, որքան 1999 թվականի հոկտեմբերի 27-ին, ոչ մի բան չբացահայտվեց: Այս մասին, այսօր՝ հոկտեմբերի 27-ին լրագրողների հետ զրույցում նշեց Կարեն Դեմիրճյանի այրին՝ Ռիմա Դեմիրճյանը՝ հավելելով, որ իր կարծիքով՝ նման հանցագործությունները չեն բացահայտվում, նույնիսկ եթե իմանում են:
«Քենեդիի սպանությունը մինչ օրս չի բացահայտվում, բայց շատերը գիտեն: Ես, օրինակ, մի բան գիտեմ, որ Կարեն Դեմիրճյանը շատերին խանգարում էր և՛ դրսում, և՛ ներսում: Սա, ընդհանարպես, գլոբալ քաղաքականության հարց է, այստեղի հետ այնքան չի կապված, որքան դրսի: Ճիշտ է, հայերի ձեռքերով են կատարել, բայց հայերը շատ թշնամիներ ունեն, երևի տեսան միասնությունը, հատկապես երբ միացան Վազգենի հետ, դա հզոր ուժ էր, դրանից վախեցան»,-նշեց Կ. Դեմիրճյանի այրին:
Պատասխանելով «Առաջին լրատվական»- ի հարցին՝ ուրի՞շ Հայաստան կունենայինք, եթե Կ. Դեմիրճյանը և Վ. Սարգսյանը ողջ լինեին, Ռիմա Դեմիրճյանը նշեց. «Ես չեմ ստի, որ ամեն ինչ լավ կլիներ, որովհետև ժամանակները դժվար են, ղեկավարելը շատ դժվար է, բայց զգալի չափով ուրիշ կլիներ: Կարեն Սերոբիչը մի հարցազրույցում ասել է՝ իշխանությունը դժվար գործ է, բայց նաև հաճելի, եթե ուզում ես ծառայել ժողովրդիդ ու երկրիդ»:
Ռիմա Դեմիրճյանի խոսքով՝ Հոկտեմբերի 27-ը բոլոր ոլորտների վրա քայքայիչ ազդեցություն ունեցավ: Մինչև հիմա շարունակվում է: Այդ հանցագործությունն ուղղակի խափանեց մեր ամբողջ կյանքը, ոչ միայն մեր անձնականը, այլ նաև հասարակության հանգիստը, հավատը, նպատակասլացությունը»:
Ռիմա Դեմիրճյանը նշեց, որ Կ. Դեմիրճյանը երազում էր անկախ և հզոր Հայաստան և ասում էր՝ անկախությունը լավ բան է, բայց պետք է ամրագրես և ապահովես:
Ռիմա Դեմիրճյանը հույս չունի, որ «Հոկտեմբերի 27-ը» երբևէ կբացահայտվի. «Ես միշտ ասել եմ, որ դա կարող է պատահականորեն ստացվի, որովհետև այնպիսի ուժեր են խառնված: Շատ մտածված էր ամեն բան, ինչո՞ւ պետք է գային ԱԺ, ինչու պետք է ասեին, թե պատահական ենք սպանել: Ո՞նց եք պատահական սպանել, երբ ստուգողական կրակոց է եղել: Ամեն ինչ մտածված էր մինչև վերջ, սա շատ հմուտ կազմակերպված քաղաքական սպանություն էր»:
Մանրմասները՝ տեսանյութում:
