Washington Examiner-ի փոխանցմամբ՝ ԱՄՆ պաշտպանության նախարարությունը վերջին երկու տասնամյակում առնվազն 58 միլիարդ դոլար է ծախսել զենքի այնպիսի համակարգերի վրա, որոնք վերջին հաշվով երբեք էլ չեն ստեղծվել։
Այդ մասին նշված է ԱՄՆ պաշտպանության փոխնախարար Ֆրենկ Կենդալի հաշվետվությունում, ով պատասխանատու է սպառազինության գնումների համար։
Հաշվետվությունում նշված է զենքի մշակման 23 թանկարժեք ծրագրերի մասին։ Այդ ծրագրերի իրագործումը սկսվել է և սկզբում եղել է ֆինանսավորում, սակայն հետո նախագծերը փակվել են։
Ամենաթանկարժեք և ոչ նպատակահարմար նախագծեր են դարձել ԱՄՆ բանակի համար ապագայի մարտական համակարգերի մշակումը, որոնց վրա ընդհանուր առմամբ ծախսվել է 20 միլիարդ դոլար և RAH-66 Comanche բազմանշանակ հետախուզական-հարվածային ուղղաթիռի նախագիծը, որում ներդրվել է 9.8 միլիարդ դոլար։
Պենտագոնի ներկայացուցիչները պնդում են, որ ոչ բոլոր գումարն է ծախսվել անտեղի, քանի որ եթե ծրագիրն անգամ փակվել է, մշակված տեխնոլոգիաները հնարավոր է եղել օգտագործել զենքի այլ համակարգերում։