Երևանում մեկնարկել է բարձր մակարդակի համաժողով՝ նվիրված Եվրամիության «Արևելյան գործընկերության» երկրներում կայուն զարգացման աջակցությանը:
Միջոցառման շրջանակներում լրագրողների հետ հանդիպեցին ՀՀ տարածքային կառավարման և զարգացման նախարար Դավիթ Լոքյանը, Հայաստանում Եվրամիության պատվիրակության ղեկավար, դեսպան Պյոտր Սվիտալսկին, Եվրամիությունը ներկայացնող այլ պաշտոնյաներ:
«Այսօր մենք նշում ենք երեք կարևոր միջացառում,- հայտարարեց Եվրոպական հանձնաժողովի Արևելյան հարևանության բաժնի ղեկավար Լոուրենս Մերեդիտը:
– Նախ, մենք նախարար Լոքյանի հետ նշում ենք Հայաստանի տեղական ինքնակառավարման 20-ամյակը: երկրորդը, ինձ համար մեծ հաճույք է հայտարարել Քաղաքապետերի դաշնագրի շատ հաջող նախաձեռնության մասին, որը նվիրված է կլիմայի փոփոխության խնդիրներին և էներգետիկ արդյունավետության զարգացմանը:
Երրորդը, հայտարարում եմ քաղաքապետերի բոլորովին նոր՝ տնտեսական զարգացման նախաձեռնության մասին, որը աշխատելու է բոլոր տեղական համայնքների հետ Արևելյան գործընկերության երկրներում՝ ամրապնդելով տեղական տնտեսական զարգացումը»:
Եվրամիության պատվիրակության ղեկավար Պյոտր Սվիտալսկու խոսքով՝ համաժողովը շատ կարևոր միջոցառում է ԵՄ Հարևանության քաղաքականության և մասնավորապես՝ «Արևելյան գործընկերություն» ծրագրի շրջանակներում, բայց այն համաժողովը շատ կարևոր է նաև Հայաստանի համար:
«Համաժողովը հերթական միջոցառումն է այս շաբաթ Հայաստանում սկսված հանդիպումների, սեմինարների շարքում: Դրանք կայացել են Եվրամիության հովանու ներքո՝ ուղղված բիզնեսի զարգացմանը: Այս համաժողովը Արևելյան գործընկերության երկրների և դրանց շրջանների կայուն զարգացման մասին է: Հայաստանը այսօր ունի շատ կարևոր մի փաստաթուղթ՝ տարածքային զարգացման ռազմավարություն: Այն այժմ գործարկվում է՝ թևակոխելով իրագործման փուլ, և Եվրամիությունը պատրաստ է տարբեր նախագծերի միջոցով աջակցել Հայաստանին՝ երկրի շրջանների հավասար և կայուն զարգացման գործում, որպեսզի փակվի ճեղքը Երևանի ու մյուս շրջանների միջև, և մայրաքաղաքն և մյուս շրջանները հավասարապես զարգանան»,- նշեց դեսպան Սվիտալսկին:
Նախար Դավիթ Լոքյանն էլ, շնորհակալություն հայտնելով եվրոպացի գործընկերներին շնորհավորանքների համար, տեղեկացրեց, որ Տեղական ինքնակառավարման մարմինների վերջին ընտրությունները բարձր է գնահատվել Եվրախորհրդում տեղի ունեցած քննարկումների ժամանակ:
Մանրամասները՝ տեսանյութում
Արամ Սարգսյան