Կառավարությունն առաջարկում է դատապարտյալների համար կրթական դասընթացներ անցկացնել՝ ազատ արձակվելուց դեռևս 6 ամիս առաջ: Այս մասին ԱԺ ամբիոնից Զբաղվածության մասին օրենքում լրացումներ կատարելու մասին օրինագծի քննարկման ժամանակ հայտարարեց ՀՀ արդարադատության փոխնախարար Սուրեն Քրմոյանը: Նա նշեց, որ օրենքի փոփոխությամբ առաջարկվում է քրեակատարողական հիմնարկներում գտնվող անձանց մասնագիտական ուսուցման իրավունքի ու դրա իրացման համար նոր մեխանիզմներ ամրագրել:
«Նախագծին կողմ ենք քվերակելու, որովհետև օրենքով լավ բան է ամրագրվում, բայց դրվելու է դարակում»,- նախագծի վերաբերյալ նշեց ԲՀԿ խմբակցության ղեկավար Նաիրա զոհրաբյանը: – Մի բերեք ուտոպիստական նախագծեր, բոլորս էլ գիտենք, որ Հայաստանում աշխատատեղ չկա:
Հասարակ խնդիր լուծելու անհրաժեշտություն կա. հսկայածավալ արտագաղթի պատճառով մարդիկ Հայաստանում հարազատներ չունեն, դատապարտյալները պետք է Skype-ով շփվելու հնարավորություն ունենան»:
Սուրեն Քրմոյանը նշեց, որ խորքային խնդիրներ ունեն հիմա երկարատեւ տեսակցության հետ կապված. «Հիմա Կարմիր խաչի հետ համագործակցում ենք, որ գոնե մեկ-երկու տեղում այդ համակարգիչները տեղադրենք: Հույս ունեմ՝ հաջորդ քննարկմանը գոնե մեկ-երկու պիլոտային ծրագիր կներկայացնենք:
Մանրամասները՝ տեսանյութում:
