Նոր կառավարության վեցամսյա ծրագրում գյուղատնտեսության վերաբերյալ հատվածը կազմում է ընդամնեը մեկ էջ: «Առաջին լրատվական»-ի հետ զրույցում ՀՀ ագրարագյուղացիական միավորման նախագահ Հրաչ Բերբերյանը, անդրադառնալով ծրագրին և գյուղատնտեսության խնդիրներին, ներկայացրեց իր մտահոգությունները:
Նրա խոսքով՝ կառավարության ծրագիրը կարճաժամկետ է, իսկ գյուղատնտեսության անելիքների շուրջ պետք է մեկ տարի առաջ մտածել: «Թե ինչ մոտեցումներ ցույց կտա կառավարությունը, հետագայում կերևա, գյուղատնտեսությունն այն բնագավառն է, որ ինչ ցանում ես, այն էլ հնձում ես, նախօրոք որևէ բան չասենք, որովհետև մոտեցումների հետ կապված հարցեր են: Ասել, որ մենք այսօր բավարարված ենք այդ ծրագրով՝ ոչ, բայց նաև չենք կարող մեղադրել կառավարությանը, քանի որ ծրագիրը վեցամսյա է, հիմա կառավարությունը փորձել է մի քանի քայլ անել, որ նեցուկ կանգնի գյուղացուն, սա էլ է խրախուսելի, հույս ունեմ հաջորդ ծրագիրն ավելի հստակ կլինի»:
«Կարևոր է հասկանալ, թե մենք գյուղատնտեսությունը, այս երկիրն ուր ենք տանում. տանում ենք նրան, որ ռուսական սոխն ու կարտոֆի՞լը հայտնվի Հայաստանի շուկայում, հաջորդ տարի էլ Աստրախանի ձմերո՞ւկը»,- նշեց Հ. Բերբերյանը՝ ընդգծելով, որ հստակ պետք է որոշվի, թե ինչ ուղղությամբ պետք է տարվի գյուղատնտեսությունը:
«Այսօր հայ ֆերմերը, հողի մշակը չի կարող մրցունակ լինել ռուսաստանյան հողագործների հետ, այնտեղ կան լուրջ սուբսիդիաներ և պետական ծրագրեր կան, որոնք հովանավորում են գյուղատնտեսության կոնկրետ ճյուղի զարգացումը: Մի քանի տարում Ռուսաստանը արդեն շատ լուրջ դեր է խաղում միջազգային շուկայում ցորենի արտադրության մեջ: Այս տարի 30 մլն ավել ցորեն ունի, այդ ցորենն ո՞ւր է լցնելու, բնականաբար Հայաստան: Առանց այն էլ փոքր ցանկատարածքները փորձում ենք պահպանել, ցորեն ենք մշակում, բայց ցորենի այս ինտրվենցիան կբերի նրան, որ Հայաստանում ցորենի ցանկատարածքները կպակասեն:
Այսօր մեր ֆերմերները բավականաչափ սոխ ունեն պահեստներում, մեծածախ գնի ինքնարժեքն իջել է մինչև 80 դրամ: Այս հարցով մենք շատ մտահոգված ենք: Այստեղ միայն Ռուսաստանի գործոնը չէ, այլ այն, թե մենք մեր երկիրի զրագացումն ինչ ուղղությամբ ենք տեսնում: Ունենք նաև օրենսդրական դաշտի կարգավորման խնդիր»,- նշեց Հ. Բերբերյանը:
Մանրամասները` տեսանյութում: