ԱԺ ԲՀԿ խմբակցության քարտուղար Վահե Էնֆիաջյանը, «Առաջին լրատվական»- ի հետ զրույցում անդրադառնալով նախօրեին Գագիկ Ծառուկյանի տան առջև տեղի ունեցած հավաքին, որի մասնակիցները պահանջում էին նրա վերադարձը քաղաքականություն, նշեց, որ հավաքը նախաձեռնել են կուսակցության տարածքային կառույցների որոշ ներկայացուցիչներ, ՀԿ ներկայացուցիչներ և մարդիկ, «ովքեր Գագիկ Ծառուկյանի գործունեությունը հավանել են և համարում են, որ նա անմասն չպետք է մնա քաղաքական գործընթացներից և որ առաջիկայում նրա մասնակցությունը մեծ քաղաքական գործընթացներում պետք է լինի լիարժեք, կարևորում են և՛ նրա անձը, և՛ նրա գործունեությունը»:
Էնֆիաջյանը նշեց, որ այդ մեծ հավաքի մասին տեղեկացել է ԱԺ-ում իր գործընկերներից. «Եվ մեկնել եմ այնտեղ, հանդիպել եմ քաղաքացիներին, նաև կուսակից գործընկերներից կային, լսել եմ նրանց, ես ևս ելույթ եմ ունեցել: Գագիկ Ծառուկյանի հետ հանդիպում տեղի չունեցավ, բազմահազար մարդկանց պատվիրակները նամակ ձևակերպեցին և փոխանցեցին անվտանգության աշխատակիցներին՝ խնդրելով փոխանցել Գ. Ծառուկյանին»:
Վ. Էնֆիաջյանը հավաստիացրեց, որ Գագիկ Ծառուկյանից երբեք չի լսել, որ նա ցանկություն ունի վերադառնալ ակտիվ քաղաքականություն: Նա նշեց, որ կուսակցությունը կազմակերպչական աշխատանքներ, խորհրդակցություններ չի իրականացրել, սակայն վստահ է, որ եթե իրականացներ, շատ ավելի բազմամարդ կլիներ Գ. Ծառուկյանի վերադարձը պահանջողների հավաքը:
Ո՞ւմ է պետք Գ. Ծառուկյանի վերադարձը. իշխանության ներկայացուցիչները մեկ տարի առաջ բավականին կոշտ գնահատականներ էին հնչեցնում, իսկ այժմ բավականին մեղմ են իրենց գնահատականներում. այս դիտարկմանն անդրադառնալով՝ Վ. Էնֆիաջյանը նշեց, որ չի փորձի մեկնաբանել, թե իշխանության ներկայացուցիչներից ով ինչ մոտեցումներ ունի և ինչ փոփոխություններ են եղել նրանց մոտեցումներում:
Վ. Էնֆիաջյանը նշեց, որ ցանկալի է համարում Գ. Ծառուկյանի վերադարձը, նրա կարծիքով՝ կուսակցությունը Գ. Ծառուկյանի վերադարձով այլ թափ կստանա, և դրա արդյունքում ՀՀ-ում մի շարք գործընթացներ ևս այլ թափ կստանան:
Իսկ կվերադառնա՞ ակտիվ քաղաքականություն Գ. Ծառուկյանը, թե՞ ոչ այն ամենից հետո, ինչ տեղի ունեցավ, այս հարցին Վ. Էնֆիաջյանը դժարացավ պատասխանել. «Ես չեմ կարող նրա փոխարեն պատասխանել»:
Մանրամասները՝ տեսանյութում: