Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանում շարունակվում էր Գևորգ Սաֆարյանի գործի քննությունը: Դատական նիստի ընթացքում Սաֆարյանը հանդես եկավ հայտարարությամբ:
«Դատական նիստերին հարցաքննելով վկաներին՝ նաև վերջին վկային, ևս մեկ անգամ ինձ համար պարզ դարձավ, որ նախաքննությունը գնացել է ոչ միայն կոպիտ խախտումներով և ուղղակի մարդու գլխին գործ սարքելով, այլ գնացել է քրեական օրենսգրքով արգելված մեթոդներով: Մասնավորապես՝ վկաներից մեկն արդեն դատարանի դահլիճում մեր բոլորի հարցերին մի քանի անգամ պատասխանեց, որ ինքը չի տվել այնպիսի ցուցմունք, ինչպիսին որ քննիչն իր անունից գրել է: Հետո մենք ականատես եղանք, որ մյուս վկան ասաց, որ իր հարցաքննության ժամանակ ինքը հարցաքննությանը մասնակցել է, հետո հեռացել է քննչական մարմնի շենքից մի քանի օր հետո վերադարձել է և շարունակել է հարցաքննությունը, այնինչ քննիչը կեղծելով փաստաթուղթը գրել էր, որ հարցաքննությունը տվյալ վկայի սկսվել և ավարտվել է նույն օրը:
Եվ վերջին վկան իր ցուցմունքում ասաց, որ ինքը ուրևիցե մեկին տեսագրության մեջ մատնացույց չի արել, չի ասել, որ այս մարդն է հարվածողը, չի ասել, որ այս մարդն է այս ոստիկանին հարվածել և անգամ վկան էլ իր կողմից մեկնաբանություն տվեց, ասաց ես ոնց կարող էի այդպիսի բան ասել, եթե ես այդ մարդկանց դեմքը չեմ տեսել: Անգամ ասաց, որ ոստիկանը համազգեստով էր, ես ի՞նչ իմանայի, որ նույն ոստիկանն էր և այլ:
Սակայն քրեական գործի նյութերում գրված է, քննիչը գրել է, թե այս վկան մատնացույց արեց տեսագրության վրա Գևորգ Սաֆարյանին և ասաց, որ հարվածողը Գևորգ Սաֆարյանն էր և մատնացույց արեց Գեղամ Խաչատրյանին և ասաց՝ հարված ստացողը Գեղամ Խաչատրյանն է:
Այսինքն` այստեղ կան ակնհայտ քրեական օրենսգրքով արգելված գործողություններ, և կոչ եմ անում դատախազության ներկայացուցչին այս հայտարարությունն ընդունել որպես հաղորդում հանցագործության մասին և պատասխանատվության ենթարկել:
Այս ամենը ցույց է տալիս, պարոն դատավոր, որ ինչպես մենք բազմաթիվ անգամ հայտարարել ենք այս քրեական գործը որևիցե կապ չունի իրավաբանության հետ, սա իմ նկատմամբ քաղաքական հետապնդում է»:
Մանրամասները՝ տեսանյութում:
