Այսօր խորհրդարանում լրագրողների հետ զրույցում ԱԺ փոխնախագահ Էդուարդ Շարմազանովը՝ անդրադառնալով պատգամավոր Նիկոլ Փաշինյանի հայտարարությանը, թե Մոսկվայում տեղի ունեցած սպանությունների թելերը բերում են դեպի ՀՀ ԱԺ և կապված են ԱԺ ՀՀԿ խմբակցության պատգամավոր Սամվել Ալեքսանյանի անվան հետ, նշեց, որ Ազգային ժողովում պետք է խոսեն ըստ էության և օրակարգի վերաբերյալ, իսկ այդ հարցն օրակարգի հետ որևէ կապ չուներ:
«Եթե խնդիր ունեն երևալու և ցույց տալու, որ իրենք ամեն ինչից տեղյակ են, պատմությունը ցույց է տալիս, որ ով ամեն ինչից խոսում է, իր տեղը պետք է խոսա»,- նշեց Է. Շարմազանովը: Նրա խոսքով՝ եթե կա խնդիր, այդ խնդրով պետք է զբաղվեն իրավապահ մարմինները, իսկ խորհրդարանը շոուներ անելու տեղ չէ:
«Շատերի մասին շատ բան կարող են խոսել, ես ոչ հաստատողն եմ, ոչ փաստաբանն եմ, ոչ էլ հերքողն եմ: Մինչև ձեր նշած պատգամավորի հայտարարությունը, մամուլն արդեն նմանատիպ հրապարակմամբ հանդես էր եկել, և ես կարծում եմ, որ մամուլի ցանկացած հրապարակման իրավապահներն ուշադրությամբ հետևում են»,- նշեց Է. Շարմազանովը:
Հարցին, թե ՀՀԿ խմբակցությունն ինչպե՞ս է վերաբերում այն հանգամանքին, որ իրենց խմբակցության անդամի անունը կապվում է նման աղմկահարույց դեպքի հետ, Շարմազանովը պատասխանեց, որ քաղաքականությունն այդպիսին է. «Այդպես ամբողջ աշխարհում է, երբ հետևեք Թրամփ և Քլինթոն դեբատներին, կզգաք, որ նույնիսկ աշխարհի ամենազարգացած ու ժողովորդավար երկրում նախագահի երկու ամենահավանական թեկնածուներն ինչի մեջ ասես իրար մեղադրում են: Դա նոր երևույթ չէ քաղաքականության մեջ: Երբ մեղքը կհաստատվի, այն ժամանակ կխոսենք: Իսկ առհասարակ ժողովրդավարության մեջ գործում է անմեղության կանխավարկածը»:
Մանրամասները՝ տեսանյութում: