Իրանական SHANIA լրատվական գործակալության փոխանցմամբ՝ Իրանի նավթային արդյունաբերության նախարար Բիժան Նամդար Զանգանեհը հայտարարել է, որ Իրանի նավթային սեկտորը կարիք ունի մինչև 2021 թվականը 130 միլիարդ դոլարի ներդրումների։
Նա ընդգծել է, որ զարգացման ազգային վեցերորդ հնգամյա պլանի հիման վրա, որն իրականացվելու է 2016-2021 թվականներին, Իրանի նավթային արդյունաբերությանն ընդհանուր առմամբ կպահանջվի 200 միլիարդ դոլարի ներդրում։
Նա հավելել է, որ 6-րդ պլանը հաշվարկված է էլ ավելի շատ ներդրումների համար, որոնք անհրաժեշտ են երկրի նավթային ու գազային պաշարների պաշտպանության համար։
Զանգանեհի խոսքերով՝ նավթահանքերի վերականգնման արագացումը մոտ 8 միլիարդ բարելով կմեծացնի հում նավթի արդյունահանումը, ինչը նավթի ներկայիս գներով համարժեք է 400 միլիարդ դոլարի։
6-րդ պլանի համաձայն՝ նավթի արդյունահանման ծավալը ծրագրված է մինչև 2021 թվականը հասցնել օրական 5.7 միլիոն բարելի։