ԲՀԿ խմբակցության ղեկավար Նաիրա Զոհրաբյանից «Առաջին լրատվական»- ը հետաքրքրվեցին, թե տեղյա՞կ է արդյոք, որ «Բարգավաճ Հայաստան» կուսակցության հիմնադիր Գագիկ Ծառուկյանի տան դիմաց հավաքվել են ԲՀԿ մարզային կառույցների ներկայացուցիչներ՝ Գագիկ Ծառուկյանին քաղաքականություն հետ կանչելու խնդրանք-պահանջով, և արդյո՞ք կուսակցության որոշումով է այս քայլը նախաձեռնվել:
«Իհարկե տեղյակ եմ, – նշեց Նաիրա Զոհրաբյանը,- մեր որոշ տարածքային կառույցներում վաղուց նման նախաձեռնություն կար: Տարբեր առաջարկներ են եղել, առաջարկներից մեկն էլ այն էր, որ քաղխորհրդի նիստ հրավիրենք, և քաղխորհրդի որոշմամբ դիմենք պարոն Ծառուկյանին: Գիտեի, որ այսօր մեր տարածքային կառույցների ակտիվ ներկայացուցիչները պարոն Ծառուկյանի տան մոտ պետք է հավաքվեն և պահանջեն նրա վերադարձը քաղաքականություն: Այնտեղ է եղել նաև մեր խմբակցության քարտուղար Վահե Էնֆիաջյանը»:
Ն. Զոհրաբյանը տեղեկացրեց, որ Գ. Ծառուկյանի հետ հանդիպում տեղի չի ունեցել, նրա վերադարձը պահանջողները իրենց դիմում-խնդրանքը հանձնել են անվտանգության աշխատակիցներին: ԲՀԿ ղեկավարը հավաստիացրեց, որ այդ նախաձեռնությամբ հանդես է եկել այն հատվածը, որ համագործակցում է իր հետ:
Ն. Զոհրաբյանը նաև նշեց, որ Գ. Ծառուկյանի հետ պայմանավորվածություն ունեն քաղաքական հարցեր չքննարկելու վերաբերյալ, ուստի նրա հետ չի քննարկվել նաև քաղաքականություն վերադառնալու հարցը:
Մանրամասները՝ տեսանյութում: