ՀԱԿ- ը հստակորեն ասել է, թե նոր կառավարության և նրա ծրագրի հետ կապված ինչ խնդիրներ է տեսնում. մոտեցումների, ՀՕ-ի, մենաշնորհների, չարաշահումների հետ կապած խնդիրները մինչև չլուծվեն, որևէ հիմք չունենք մտածելու, որ վարչապետն իր թիմով հանդերձ՝ Հայաստանում 17 տարի տիրող այս կոռումպացված համակարգի օրգանական շարունակությունը չէ: ԱԺ-ում այսօր լրագրողների հետ զրույցում ասաց ՀԱԿ խմբակցության ղեկավար Լևոն Զուրաբյանը:
«Այնուամենայնիվ պետք է անմեղության ինչ-որ կանխավարկած ընդունել, որ, եթե հռչակում է կոնկրետ նպատակներ, և դրա հնարավորությունները կան, շատ արագ վարչապետը կարող է ապացուցել, որ իրականում ինքն այս կոռումպացված համակարգը վերափոխելու նպատակ ունի: Շատ արագ կարելի է դա անել և ապցուցել»,- նշեց Լ.Զուրաբյանը:
Մենաշնորհների վերաբերյալ Լ. Զուրաբյանը նշեց, որ դա քաղաքական կամքի հարց է. «Այն պահին, երբ իսկապես ապահովվի մրցակցային մթնոլորտ, և ցանկացած ընկերության մուտքի հնարավորությունն այս շուկաներ, դա միանգամից կբերի գների նվազման ոչ թե՝ 10-20 դրամով, այլ խոսքը լուրջ անկման մասին է:
Բնական է, որ Պետրոս Ղազարյանի զանգը վարչապետին չի կարող լինել մենաշնորհների դեմ պայքարի լավագույն գործիքը»,- հիշեցնելով Կարեն Կարապետյանի՝ հեռուստալրագրողների հետ օրերս ունեցած հարցազրույցը, նկատեց Լ. Զուրաբյանը` հավելելով, որ չի ուզում նվազեցնել Պետրոս Ղազարյանի դերը քաղաքական և տնտեսական համակարգում, սակայն դա ոչ ոք չի համարի գործող երաշխիք մրցակցային մթնոլորտի ապահովման համար»,-նշեց ՀԱԿ խմբակցության ղեկավարը:
Լ. Զուրաբյանը նշեց, որ ինքը կոչ արել ԱԺ լսումներ կազմակերպել, որովհետև նման հարցերը պետք է քննարկել լայն հասարակության առաջ, հրավիրել գործարարների, որոնք հայտարարում են իրենց խնդիրների մասին, հրավիրել սպառողների շահերի ներկայացուցիչների: «Այդպես է հասարակությունն ապաքինվում: Պետք է բոլոր հարցերը վեր հանվեն, բաց խոսվի այդ մասին:
Պետք են ավելի լուրջ երաշխիքներ: Ժողովուրդը պետք է սպասի գների լուրջ էժանացման` շաքարի, դեղերի, վառելիքի գների էժանացման»:
Մանրամասները՝ տեսանյութում: