Վենեսուելայի Ազգային ժողովը, որի տեղերի մեծ մասը պատկանում է ընդդիմությանը, կիրակի կայացած արտակարգ նիստում հավանություն է տվել բանաձևին, որը գործադիր իշխանության գործողություններն անվանում է սպառնալիք սահմանադրական կարգին։ Այն նաև մտադրություն է հայտնել սկսելու նախագահ Նիկոլաս Մադուրոյի դեմ իմփիչմենթի գործընթաց։ Այս մասին հայտնում է El Universal-ը։
Փաստաթուղթը կազմված է 9 կետից։ Պատգամավորները մասնավորապես մեղադրել են գործադիր իշխանությանը պետական հեղաշրջում իրագործելու մեջ։ Նրանք նաև հայտարարել են Միջազգային քրեական դատարան դիմելու անհրաժեշտության մասին։
Խորհրդարանականների կտրուկ արձագանքն էր առաջացրել հանրաքվեի օգնությամբ նախագահի հեռացման նախաձեռնության հակազդումը։ Ընդդիմությունը սկսել է դրա անցկացման ստորագրահավաք, սակայն երկրի մի շարք շրջաններում դատարանները փաստել են այդ ընթացակարգում խախտումների առկայություն։ Ստորագրահավաքի երկրորդ փուլը պետք է անցկացվեր հոկտեմբերի 26-28-ը, սակայն անցած հինգշաբթի Ազգային ընտրական խորհուրդը՝ կապված դատական վճիռների հետ, հայտնել էր, որ այդ փուլի անցկացումը հետաձգվում է անորոշ ժամկետով։