Իրաքի քրդերն ահաբեկիչներից ազատագրել են Մոսուլից 12 կմ հյուսիս-արևելք գտնվող Բաշիկա քաղաքը։ Այս մասին հայտնում է Reuters գործակալությունը՝ հղում անելով ամերիկյան աղբյուրին։
Ավելի վաղ հաղորդվել էր, որ իրաքցի զինվորականներն ու քրդական ուժերը երկու նոր ճակատ են բացել Բաշիկայի շրջանում և քաղաքի համար մարտեր են վարում ահաբեկիչների դեմ։ ԴԱԻՇ-ից Մոսուլի ազատագրման գործողությունը շարունակվում է հոկտեմբերի 17-ից։
Գործակալությունը փոխանցում է, որ քրդերի կողմից Բաշիկայի գրավման մասին հայտնել է Իրաքյան Քրդստանի նախագահ Մասուդ Բարզանին անձամբ՝ Պենտագոնի ղեկավար Էշթոն Քարթերի հետ զրույցում։
Բաշիկայից ոչ հեռու գտնվում է նույնանուն ռազմաբազան, որտեղ տեղակայված են թուրք զինվորականները, ովքեր Իրաք են մտել 2015-ի վերջին՝ Մոսուլի վրա հարձակմանը սուննիական և քրդական ուժերին նախապատրաստելու պատրվակով։