Հայաստանի արտաքին քաղաքական նախապատվությունների, արտաքին քաղաքական զարգացումների, նոր կառավարության ծրագրի շուրջ՝ «Առաջին լրատվական»- ը «Դիսկուրս» հաղորդման շրջանակներում զրուցեց ԱԺ ԲՀԿ խմբակցության պատգամավոր Միքայել Մելքումյանի և ԱԺ ՕԵԿ խմբակցության պատգամավոր Մհեր Շահգելդյանի հետ: Հիմնականում քննարկվեց այն հարցը, թե Հայաստանի արտաքին քաղաքական դիրքորոշումներն ինչպես են ազդում երկրի տնտեսական զարգացման վրա:
Միքայել Մելքումյանը, անդրադառնալով հարցին, թե ԵՏՄ անդամակցությունը որքանով է նպաստում կամ խոչընդոտում մեր տնտեսական զարգացմանը նշեց. «Մեր ակնկալիքները ԵՏՄ մուտք գործելիս շատ ավելին էին, քան ներկա իրավիճակն է: Դա համընկավ Արևմուտքի կողմից Ռուսաստանի նկատմամբ տարբեր պատժամիջոցների կիրառման հետ, որը շարունակվում է մինչև հիմա: Ասվում էր՝ ունենք 180 միլիոնանոց շուկա, կարծում եմ՝ ռեալ ակնկալիքները դեռ առջևում են, բայց այն, որ Հայաստանը հնարավորություն ունի օգտվելու ԵՏՄ շուկայից, բայց հավուր պատշաճի չի օգտագործում այդ հնարավորությունը, դա էլ է փաստ: Օրինակ՝ ռուս-թուրքական կոնֆլիկտի փուլում հայկական ձեռնարկությունները չկարողացան գյուղատնտեսական տարբեր մթերքներով ու արտադրանքներով շուկան լցնել, մենք պատրաստ չէինք դրան: Հիմա ակտուալ թեմա է Իրանի նկատմամբ պատժամիջոցները մասնակի հանելու պարագայում Իրանի արտադրանքը, որպես կամուրջ, ԵՏՄ շուկա հանելը: Մենք շանս ունենք այստեղ արդյունավետ ինտեգրման, բայց Հայաստանի գործողությունները դանդաղում են, ադեկվատ չեն, մենք չենք կարղանում օգտվել ԵՏՄ հնարավորություններից: Թերևս կան նաև ներքին խնդիրներ»:
Մհեր Շահգելդյանի դիտարկմամբ՝ մեր արտաքին տնտեսական քաղաքականությունը կամ տնտեսական դիվանագիտությունը իներտ է, իսկ տնտեսական դիվանագիտությունն այսօր ռազմական և քաղաքական դիվանագիտությունների հետ մեկտեղ հմարաժեք բաղկացուցիչներից մեկն է: «Մեր տնտեսական գծով կցորդների համակարգը, ըստ էության, չի գործում: Իրականում տնտեսական վիճակը բավականին բարդ է: Բայց միայն Ռուսաստանը չէ, Ռուսաստանի շուկան հսկայական է, սակայն տարիներ առաջ, օրինակ, Ղազախստանի հետ տնտեսական հարաբերությունները բավականաչափ բարվոք էին, ժամանակին նրանք ՀՀ-ի հետ տնտեսական հարաբերություններ հաստատելու փորձեր են կատարել, սակայն ներքին խնդիրների պատճառով այդ փորձերից շատերը ձախողվել են: Խնդիրը միայն այն չէ, որ Հայաստանը ԵՏՄ հնարավորություններից չի կարողանում օգտվել, այլ խնդիրը վերաբերում է ընդհանրապես նաև այլ երկրների հետ կապված հնարավորությունները կորցնելուն: ԵՏՄ-ում խաղի կանոնները ձևավորված են, սակայն մեր փոքր արտահանողներին աջակցություն է պետք, փորձ չունեն, լրջագույն խնդիրների առջև են կանգնում, գնում են այնտեղ և այնպիսի իրավիճակի մեջ են ընկնում, որ հայական մթերքի գինն է սկսում ընկնել»,- նշեց Մ. Շահգելդյանը:
Հարցազրույցն ամբողջությամբ՝ տեսանյութում: