ՀՀ կառավարության նոր ծրագրով նախատեսվում է բյուջետային ավիափոխադրողների ներգրավման միջոցով ակտիվացնել Գյումրիի «Շիրակ» օդանավակայանի գործունեությունը: ՀՀ քաղաքացիական ավիացիայի գլխավոր վարչության պետ Սերգեյ Ավետիսյանի խոսքով՝ նախատեսվում է պարզեցնել ընթացակարգերը և գործընթացները ավիաընկերություններին հայաստանյան շուկայում գործունեություն ծավալելու թույլտվության ուղղությամբ։
Ավետիսյանը նշում է նաև, որ այդ քայլերը անուղղակի ձևով կարող են նպաստել ավիատոմսերի գների նվազմանը. «Նոր ավիաընկերությունների ներգրավման շնորհիվ այդ ամենը կբերի մրցակցության բարձրացման, ինչն էլ կնպաստի ավիատոմսերի գների նվազմանը»:
Քաղավիացիայի վարչության նախկին պետ Շահեն Պետրոսյանը «Առաջին լրատվական»-ի հետ զրույցում նշեց, որ «Շիրակ» օդանավակայանի գործունեության ակտիվացման անհրաժեշտության մասին ինքը դեռ վաղուց է խոսել: «Բայց դա պետք է դուրս դնել Էռնեկյանի լիազորություններից և սահմանել պետական վերահսկողություն, ինչպես նախկինում էր»,- ասում է նա։
Պետրոսյանի խոսքով՝ ըստ կոնցեսիոն պայմանագրի՝ «Զվարթնոցի» շուրջը 100 կմ շառավղով որևէ ավիափոխադրում չի կարող իրականացվել առանց Էռնեկյանի թույլտվության. «Բայց քանի որ հիմա մրցակցությունն ուժեղացել է, և low cost ընկերությունները սկսել են թռչել Քութայիս, Թբիլիսի և Կիև, բնականաբար՝ այդ մրցակցությանը դիմանալու համար դրական եմ համարում, որ Գյումրու օդանավակայանը օգտագործվի»։
Շահեն Պետրոսյանը դրական միտում տեսնելով հանդերձ՝ մի մտավախություն հայտնեց. նա ասում է՝ ամեն դեպքում այդ օդանավակայանը կիսառազմական է, ռուսական ռազմաբազան է այնտեղ. «Ես չեմ կարող միանգամից ասել, որ իրենց շահերին է սպասարկում։ Երբ կառավարությունը նման քննարկում էր անցկացնում, լավ կլիներ գոնե մասնագետներին հրավիրեին, մասնագետներն իրենց կարծիքները հայտնեին։ Թե չէ՝ ամեն դուսպրծուկ իրեն մասնագետի տեղ է դրել։
Ես դրա մասին արդեն 10 տարի է՝ խոսում եմ։ Նշում էի, որ Գյումրու օդանավակայանը կարող է մեզ համար պահեստային օդանավակայան լինել, որ, ենթադրենք, երբ Երևանում մառախուղ լինի, օդանավերը չգնան Թբիլիսիում կամ չգիտեմ որտեղ նստեն։ Ժամանակին միլիոններով փող ենք ծախսել, որ այդ օդանավակայանը միջազգային կարգավիճակի բերենք։ Հիմա պետք է անվտանգության խնդիրը լուծել. երբ քաղաքացիական թռիչք է իրականացվում, ռազմական թռիչքներ չիրականացվեն։ Ես քանի որ ռուսներին չեմ վստահում, հատկապես Ռուսաստանի ռազմական վերնախավին, անվտանգության խնդիրն ամեն դեպքում պետք է կարգավորել»,- եզրափակեց Քաղավիացիայի վարչության նախկին պետ Շահեն Պետրոսյանը։
