Իրաքում Մոսուլի համար պայքարը թեստ է Ռեջեփ Թայիփ Էրդողանի «նեոօսմանյան» քաղաքականության համար՝ գրում է Le Monde թերթի թղթակից Մարի Ժեգոն։
Թուրքիայի առաջնորդը խոստացել է գործել՝ տեսնելով, թե ինչպես է իր երկիրը կողքից նայում, թե ինչ է կատարվում Իրաքի հյուսիսում։
«Մենք չենք սպասի՝ մինչև խնդիրները գան և թակեն մեր դռները, մինչև ահաբեկիչները գան և զավթեն մեր հողերը։ Մենք կգնանք նրանց հետ կռվելու այնտեղ, որտեղ գտնվում են»,- ասել է Էրդողանը։
Էրդողանն Իրաքում իրեն դրսևորում է որպես «սունի արաբ եղբայրների» և «թուրքմեն եղբայրների» պաշտպան։ Թերթի փոխանցմամբ՝ թուրք առաջնորդը մի քանի օրվա մեջ արդեն երկու անգամ քննադատել է 1923թ. Լոզանի խաղաղության պայմանագիրը, որը ստորագրել են Թուրքական Հանրապետության հիմնադիր հայրերը։
«Թուրքիան չի կարող մնալ ստատուս քվոյի վիճակում։ Մենք կա՛մ կհաղթենք շնորհիվ մեր քաղաքականության, կա՛մ կդատապարտվենք սահմանափակման»,- ասել է երկրի նախագահը։
Թուրքական Sabah կառավարամետ թերթի խմբագրական հոդվածի հեղինակ և նախագահի խորհրդական Իլնուր Չևիքը հոկտեմբերի 2-ին իր սյունակում հիշեցրել է՝ «Իրաքի հյուսիսը և Սիրիան մեր հետնաբակն են»։ Մարի Ժեգոն կարծում է, որ սյունակագիրն այստեղ օրինակ է վերցնում Ռուսաստանից, որը մարդկանց ստիպում է հավատալ այն գաղափարին, թե հետխորհրդային տարածքը իր ազդեցության բնական գոտին է։
Նախկին կայսերական հողերի վրա վերահսկողություն հաստատելը «նեոօսմանյան» արտաքին քաղաքականության հիմնաքարն է եղել, որին ձգտել է նաև նախկին վարչապետ Ահմեթ Դավութօղլուն։ Նա կառավարության ղեկավարը չէ 2016թ. մայիսից, բայց նրա գաղափարները մնացել են։
Շուտափույթ կերպով հաշտվելով Ռուսաստանի նախագահ Վլադիմիր Պուտինի հետ՝ Ռեջեփ Թայիփ Էրդողանը կարծես թե պատրաստ է Մոսկվայի նման խաղարկել Իրաքի թուրքմենների և սունիների պաշտպանության քարտեզը՝ պատրաստ լինելով արդարացնել Ղրիմի բռնակցումը և Ուկրաինայի արևելյան շրջաններ ներխուժումը։
Իրաքի Էրբիլ քաղաքի Թուրքիայի նախկին հյուպատոս Այդըն Սելչենի կարծիքով՝ Էրդողանը տեսնում է, որ Պուտինը և Ասադը գործում են, նա տեսնում է, որ միջազգային հանրությունը մատնված է անգործության, ուստի ինքն իրեն հարցնում է՝ «Իսկ ինչո՞ւ ոչ՝ ես»։