ՀՀ արդարադատության նախարար Արփինե Հովհաննիսյանը կառավարության նոր ծրագրում հատկապես կարևորում է ապօրինի հարստացման քրեականացումը։ «Ապօրինի հարստացման քրեականացումը կառավարության ամենակարճաժամկետ ծրագրերից մեկն է, և դրա կյանքի կոչումը կվկայի կառավարության քաղաքական կամքի մասին՝ պայքարելու ապօրինի հարստացման դեմ»- ԱԺ-ում լրագրողների հետ զրույցում ասաց Ա. Հովհաննիսյանը։
Նրա դիտարկմամբ՝ ապօրինի հարստացման դեմ պայքարի համար միայն դրա քերականացումը բավարար չէ։ «Մեկ գործողությամբ ֆենոմենալ արդյունքներ չենք կարող արձանագրել։ Այդպես չի լինելու: Ապօրինի հարստացման քրեականացումը ինքնին մեծ արդյունք չի տա։ Սա կաշխատի այն ժամանակ, երբ կրկին կառավարության ծրագրում ամրագրված մի քանի ծրագիր ևս ճիշտ ժամանակին արվեն։ Խոսքը վերաբերում է, օրինակ, կանխիկ գործառնությունների սահմանափակման մասին օրենքին։ Եկամուտների հայտարարագրման ոլորտում ևս կարող ենք արձանագրել վարչական և քրեական հաջողություններ»,-նշեց նախարարը։
Ա. Հովհաննիսյանի խոսքով՝ օրենքի ընդունմանը պիտի հետևեն նաև փոխկապակցված անձանց շրջանակի և հայտարարագիր ներկայացնող անձանց ընդլայնումը։ Նախարարի դիտարկմամբ՝ փոխկապակցված հաջորդական քայլեր պետք է լինեն, որոնց կիրառության դեպքում միայն կարելի է հասնել հաջողության։
«Առհասարակ չկա այնպիսի երկիր, որ կոռուպցիայի դեմ պայքարը դադարեցրել է։ Այլ հարց է, թո ով ինչ մակարդակով ու ծավալներով է պայքարում կոռուպցիայի դեմ։ Ապագային ուղղված կանխատեսումներ ես չեմ կարող անել։ Ամեն դեպքում, ապօրինի հարստացման ռիսկն ու գայթակղությունը, եթե չասեմ կվերանան, ապա շեշտակի կնվազեն, քանի որ դրա համար կնախատեսվի քրեական պատասխանատվություն»,- նշեց նախարարը:
Մանրամասները՝ տեսանյութում: