ՌԴ արտգործնախարար Սերգեյ Լավրովի կողմից արված հայտարարությանը հայկական կողմը չէր կարող համարժեք պատասխան տալ, քանի որ ստեղծված իրավիճակի հիմնական մեղավորը ներկայիս իշխանությունն է։ Այս մասին ասաց «Մոդուս Վիվենդի» վերլուծական կենտրոնի ղեկավար Արա Պապյանը՝ անդրադառնալով հոկտեմբերի 14-ին ՌԴ ԱԳ նախարար Սերգեյ Լավրովի հայտարարությանը, թե Թուրքիան կարող է դրական դեր խաղալ Ղարաբաղյան հակամարտության կարգավորումը փակուղուց դուրս բերելու առումով։
Ա. Պապյանը նշեց. «Բնականաբար, պատասխանը չէր կարող համարժեք լինել, որովհետև այն մարդիկ, որոնք խնդրի պատճառն են, չեն կարող լինել այդ խնդիրը լուծողներ։ Գաղտնիք չէ, որ այս իշխանություններն են և՛ Ցյուրիխյան արձանագրությունները ստորագրել, և՛ ԵՏՄ մտնելու համաձայնագիրը»:
Դիվանագետի խոսքով՝ Ռուսաստանն ուժեղացրել է իր ազդեցությունը Հայաստանի վրա, և 90-ականների սկզբին Ռուսաստանի ազդեցությունն ավելի քիչ էր, քան հիմա։ Հենց այդ պատճառով էլ Հայաստանը իր խոսքի կշիռը կորցնում է Ռուսաստանի մոտ։
«Երբ մտանք ԵՏՄ, մենք արեցինք քաղաքական խարակիրի, մենք այլևս որպես քաղաքական գործոն, դադարեցինք Ռուսաստանի համար գոյություն ունենալ։ Հիմա մենք ամեն ինչ արել ենք ռուսների համար, որ իրենք Ադրբեջանի և Թուրքիայի հետ հարաբերությունները բարելավեն»,- նշեց Արա Պապյանը և ընդգծեց, որ Ռուսաստանը պետք է գիտակցի, որ ինքը չի կարող ունենալ և՛ Հայաստանը, և՛ Ադրբեջանը։
Ռազմավարական և ազգային հետազոտությունների հայկական կենտրոնի ղեկավար Մանվել Սարգսյանի խոսքով՝ էական ոչինչ չկա Լավրովի հայտարարության մեջ:
Մանրամասները՝ տեսանյութում: