Ինչպե՞ս է պարզվելու դիտավորությամբ, թե՞ անզգուշությամբ է արված սուտ մատնությունը. պարզաբանում է ՀՀ կառավարության աշխատակազմի ղեկավար-նախարար Դավիթ Հարությունյանը. «Քրեական օրենսգիրքը շատ հստակ տարանջատում է՝ որ դեպքում է դիտավորություն, որ դեպքում՝ անզգուշություն: Խոսքը վերաբերում է շատ ֆունդամենտալ մի գիտելիքի, որն ամրագրված է հենց օրենսգրքում»:
Հարցին, որ եթե քաղաքացին չի տիրապետում Քրեական օրենսգրքին, պե՞տք է պատասխանատվության ենթարկվի անզգուշությամբ արված սուտ մատնության համար, դավիթ Հարությունյանը պատասխանեց. «Քրեական օրենսգրքում նկարագրված հանցակազմերը ենթադրում են, որ անգամ եթե քաղաքացին չի տիրապետում այդ հանցակազմի էությանը, բայց կատարում է հանցագործություն, ապա նա պատժվում է:
Պետք է ասեմ, որ չկա որևէ ոչ տրամաբանական հանցակազմ, տվյալ դեպքում, խոսքը վերաբերում է սուտ հայտարարությանը, երբ անձն իրականում գնացել քվեարկել է, իսկ ինչ-որ մեկը կողքից ասել է, որ նա չի մասնակցել քվեարկության: Եթե մի քիչ կոպտացնեմ հարցադրումը՝ ես վկայում եմ, որ այդ անձը չի մասնակցել քվեարկությանը»:
Անդրադառնալով դիտարկմանը, որ այդ դեպքում քաղաքացիները կվախենան պատասխանատվության ենթարկվելուց և գուցեև չբարձաձայնեն տեղեկությունը, որին տիրապետում են, Հարությունյանը պատասխանեց. «Եթե քաղաքացին վստահ չէ, որ իր գիտելիքը ճիշտ է, ուրեմն ճիշտ է, որ մի քանի անգամ մտածի: Եթե մեկից լսել է, որ այն մարդն այստեղ չէ ու հավանաբար չի քվեարկել, իսկապես ճիշտ չէ, որ հայտարարություն անի: Եթե գիտի, որ օրինակ՝ եղբայրն այդ պահին գտնվում է ՌԴ-ում եւ չի կարող մասնակցել քվեարկության, ինչի՞ց պետք է մտահոգ լինի, որ հանկարծ եղբայրը կհայտնվի՞ Երևանում»:
Նման հայտարարությունների համար, ըստ Դ. Հարությունյանի, պատասխանատվություն է պահանջվում, որովհետև հետևանքը շատ լուրջ է. «Այդ հայտարարության արդյունքներով անկախ նրանից ճիշտ է, թե սխալ, հնարավոր է 48 ժամվա ընթացքում հանձնաժողովը չկարողանա մինչև վերջ ստուգել և ստիպված պետք է այն ընդունի որպես ճշմարտություն, ինչի արդյունքում կարող է երկրում անվավեր ճանաչվել ընտրությունները: Հաշվի առնելով, թե ինչ հետևանք կարող է ունենալ հայտարարությունը, հայտարարություն տվողը պետք է խուսափի սուտ տեղեկություններ հայտնելուց»:
Մարամասները՝ տեսանյութում: