Հայաստանի ՄՌ Ասոցիացիայի և Կասկադ Քնսալթընթս ընկերության նախաձեռնությամբ հոկտեմբերի 17-18-ը Աղվերանում կայացավ 5-րդ տարածաշրջանային ՄՌ համաժողովը, որն այս տարի անդրադարձավ գործնական աշխարհում մարդկային կապիտալի ուսումնասիրման ոլորտում ամենաուշագրավ թեմաներից մեկին՝ Ինտելեկտի գործակից. ընդհանուր, թե՞ հուզական (IQ vs EQ):
Գնահատելով այս միջոցառման կարևորությունը ՄՌ ոլորտի կայացման և զարգացման գործում՝ այս տարի ևս համաժողովին աջակցում էր Գերմանիայի միջազգային համագործակցություն ընկերությունը (GIZ GmbH) Գերմանիայի միջազգային տնտեսական համագործակցության և զարգացման դաշնային նախարարության ֆինանսավորմամբ իրականացվող «Մասնավոր հատվածի զարգացում Հարավային Կովկասում» ծրագրի շրջանակներում:
Այս տարվա համաժողովի հատուկ հյուրն էր աշխարհի 3 խոշորագույն քոուչինգ դպրոցներից մեկի՝ Էրիքսըն Քոուչինգ Ինթերնեյշնըլ ընկերության հիմնադիր Մերիլին Էթկինսոնը, որի մշակած մի շարք քուչինգ մոդելներ հաջողությամբ ներդրվել և կիրառվում են աշխարհի բազմաթիվ կազմակերպություններում: «Անչափ ուրախ եմ՝ ներկա գտնվելու այս համաժողովին: Հաճելի է տեսնել լսարանի աճող հետաքրքրությունն ու ներգրավվածությունը: Ինձ ուղղված հարցերից կարող եմ ենթադրել, որ այստեղ հավաքված են իրենց գործին նվիրված մասնագետներ, որոնք նաև հետաքքրված են՝ բացահայտելու նոր մոտեցումներ և մեթոդներ: Վստահ եմ, որ այս համաժողովը կնպաստի նրանց մասնագիտական հմտությունների աճին», -ասաց Մերիլին Էթկինսոնը:
«Թվով 5-րդ տարածաշրջանային ՄՌ համաժողովը, որն ամեն տարի կազմակերպվում է Կասկադ Քնսալթընթս ընկերության և Հայաստանի ՄՌ Ասոցիացիայի համատեղ ջանքերով դարձել է ոլորտի գլխավոր և ամենասպասված իրադարձությունը տարածաշրջանում։ Սա փաստում է այն մասին, որ համաժողովի գաղափարը, ձևափաչը և ընտրված թեմաները սիրվել և կարևորվել են շուկայում: Հինգ տարիների ընթացքում մենք կարողացել ենք կյանքի կոչել կարևոր նախաձեռնություններ՝ մասնավորապես Հայաստանում ՄՌ մասնագիտության սերտիֆիկացումը ըստ միջազգային ստանդարտների (HRCI, մասնավորապես՝ PHRi կամ SPHRi), քոուչինգի ներկայացումը և Միջազգային Քոուչինգ Ֆեդերացիայի (ICF) հավաստագրման ճանապարհի հարթումը մասնագիտական համայնքի համար, մշտապես առաջարկել ենք առավել արդի և կիրառական ՄՌ գործիքներ՝ դրանով իսկ խրախուսելով մարդկային կապիտալի շարունակական զարգացման մշակույթը», – ասաց Հայաստանի ՄՌ Ասոցիացիայի նախագահ և Կասկադ Քնսալթընթս ընկերության հիմնադիր Արփի Կարապետյանը:
«ԳՄՀԸ «Մասնավոր հատվածի զարգացում Հարավային Կովկասում» ծրագրի և Հայաստանի ՄՌ Ասոցիացիայի համագործակցության արդյունքում զբոսաշրջության, սննդի և խմիչքի, տեքստիլի, ՏՏ և այլ ոլորտների ձեռնարկությունների ղեկավարներն ու ՄՌ մասնագետները հնարավորություն են ունենում տեղեկանալ ՄՌ ոլորտի առաջատար տեխնիկաներին, ծանոթանալ և գործնական կապեր հաստատել ոլորտի առաջատար և եզակի մասնագետների հետ, զարգացնել գործնական կարողություններ, որոնք հետո ներդնում են իրենց կազմակերպություններում` ի նպաստ մարդկային ռեսուրսների կատարողականի բարելավմանը և ընկերությունների արտադրողականության ու մրցունակության բարձրացմանը»,-նշեց Գերմանիայի միջազգային համագործակցության ընկերության «Մասնավոր հատվածի զարգացում Հարավային Կովկասում» ծրագրի Հայաստանի թիմի ղեկավար Վիլհելմ Հյուգոն:
«Կասկադ Քնսալթընթս ընկերությունը, ՄՌ կառավարման ոլորտի բարձրորակ նորարարական ծառայություններ մատուցող առաջատար ընկերություն լինելով, 5 տարի անընդմեջ խթանում է ՄՌ ինդուստրիայի ժամանակակից տենդենցների տարածումը տարածաշրջանում: Այս տարվա թեման առանձնահատուկ է իր կարևորությամբ և խորությամբ. հուզական ինտելեկտի հարցը ողջ աշխարհում գործարար միջավայրի ուշադրության կենտրոնում է», – նշեց Կասկադ Քնսալթընթս ընկերության կառավարման գործընկեր Արմինե Հայրապետյանը:
«Մեր համագործակցությունը Հայաստանի ՄՌ Ասոցիացիայի և Կասկադ Քնսալթընթս ընկերության հետ նպատակ ունի ուժեղացնել ՄՌ մենեջերների գործառույթը և նրանց ռազմավարական դերը կազմակերպություններում, զարգացնել ընկերության ղեկավարի և ՄՌ գործառույթի միջև սերտ համագործակցությունը՝ ճիշտ մարդկանց ընտրելու, նրանց որակները և որակավորումները տնտեսապես առավել արդյունավետ միջոցներով զարգացնելու, յուրաքանչյուր աշխատողի արդյունքները կազմակերպության նպատակների հետ կապելու հարցերում»,-ընդգծեց Գերմանիայի միջազգային համագործակցության ընկերության (GIZ GmbH) «Մասնավոր հատվածի զարգացում Հարավային Կովկասում» ծրագրի փորձագետ Գայանե Սերոբյանը:
Համաժողովին ներկա էին 140-ից ավելի պատվիրակներ՝ ՄՌ մասնագետներ և փորձագետներ, ընկերությունների ղեկավարներ և ոլորտով հետաքրքրվող անձիք ավելի քան 90 տեղական և միջազգային կազմակերպություններից:
