Ադրբեջանի նախագահը Դմիտրի Կիսելյովին տված հարցազրույցում նշել է, որ ԼՂՀ հակամարտության կարգավորումով հնարավոր է Ղարաբաղին տրվի ինքնավար պետության կարգավիճակ, բայց նաև նշել է, որ պետք է ազատագրված հարակից շրջանները հանձնվեն Ադրբեջանին:
Ռուսական մամուլին տրված հարցազրույցի և բանակցությունների փակուղում գտնվելու վերաբերյալ «Առաջին լրատվական»- ը զրուցեց քաղաքագիտության դոկտոր Հայկ Ա. Մարտիրոսյանի հետ:
«Շատ լավ է, որ ստեղծվել է փակուղային իրավիճակ և հրաշալի է, որ Ալիևը նման հայտարարություններ է անում, դա բխում է միայնումիայն հայկական կողմի շահերից, թեև հայկական կողմը, թվում է, թե ամեն ինչ անում է, որ իր շահերից ոչինչ չբխի: Ալիևի հայտարարությունը նվեր է Հայաստանին»,- նշեց քաղաքագետը և երկայացրեց իր պարզաբանումները:
«Սեղանին կա փաստաթուղթ կամ բանակցությունների փաթեթ, մանրամասները գաղտնի են պահվում, այդ փաթեթի բովանդակության համաձայն՝ հայկական կողմը ինչ-որ բաներ պետք է հանձնի Ադրբեջանին ինչ որ բանի դիմաց: Ալիևի այս խոստովանությունից մենք տեսնում ենք, որ Ալիևը պահանջում է ազատագրված յոթ շրջանները, որոնք իրականում Արցախի մասն են, բայց չգիտես ինչու, մենք անընդհատ ասում ենք հողեր, տարածքներ և հանցավոր կերպով երբեմն ասում ենք հետ տալ, դրանք երբեք Ադրբեջանինը չեն եղել, թեև եղել են Խորհրդային Ադրբեջանի կազմում: Ալիևը նախ պահանջում է այդ շրջանները, և դրա դիմաց, պարզվում է, որ ինքը պատրաստ է Արցախին տրամադրել ինքնավարության կարգավիճակ Ադրբեջանի կազմում: Հայկական կողմը պատրաստ է նույն պահանջները բավարարելուն, բայց ինքնավարությանը Ադրբեջանի կազմում ինքնավարությանը պատրաստ չէ, այլ պահանջում է Արցախի անկախության ճանաչում»,-նշեց Հայկ Մարտիրոսյանը և ընդգծեց, որ այդ անկախությունը Արցախին պետք չէ ամենևին, Արցախը Հայաստանի մաս է և պետք է նաև դե յուրե միացվի Հայաստանին:
Մանրամասները՝ տեսանյութում:
