«ՀՀ Ընտրական օրենսգրքում փոփոխություններ և լրացումներ կատարելու մասին» օրենքի նախագծի առաջին ընթերցման եզրափակիչ ելույթին հիմնական զեկուցող, Կառավարության աշխատակազմի ղեկավար-նախարար Դավիթ Հարությունյանը նկատեց, թե պատգամավորների ելույթների մի հատվածը նախընտրական քարոզչություն էր, որի կարիքը մեծամասնությունը չունի:
Անդրադառնալով նախագծին, նշեց, թե քննադատություններ են եղել, թե կնքված հուշագրից շեղում է եղել. «Այն ամբողջովին արտացոլել ենք ուղղակիորեն այն նախագծում, որ ձեզ ներկայացրել ենք»:
Դավիթ Հարությունյանը նշեց, որ կարող է հասկանալի լինել, եթե ընդդիմադիրները որոշեն հետ կանգնել համաձայնագրից, սակայն հիշեցրեց՝ համաձայնագրի յուրաքանչյուր դրույթ բալանսավորված է մեկ այլ դրույթով: Մասնավորապես խոսեց այն դրույթից, որ դիմումատուն պատասխանատվություն է կրում իր դիմումի ապացույցների համար, հակառակ դեպքում կենթարկվի քրեական պատասխանատվության:
Ըստ նրա` խոսքը վերաբերում է 3 դրույթի, կարող են հանել և քրեական պատասխանատվություն սահմանել թե՛ սուտ հայտարարության, թե՛ կեղծ դիմումի համար, թե՛ կրկնաքվեարկության համար, և նրանք պետք է հավասարեցվեն, և պետք է վերացվի հավաստիության կանխավարկածը:
«Ընդունում եմ, որ կարող եք փոխել ձեր կարծիքը, պատրաստ եմ քննարկման, բայց հաշվի առեք՝ խոսքը վերաբերում է կոմպլեքսային լուծմանը, իսկ գնդակը ձեր դաշտում է»,- եզրափակեց Դ. Հարությունյանը:
Մանրամասները՝ տեսանյութում: