ՀՀ վարչական դատարանը քիչ առաջ որոշում կայացրեց մերժել «Բարգավաճ Հայաստան» և «Հայկական վերածնունդ» կուսակցությունների հայցն ընդդեմ թիվ 34 ընտրատարածքային ընտրական հանձնաժողովի որոշման։
Բոնուսային մեխանիզմի կիրառման արդյունքում այս կուսակցություններից մեկական մանդատ փոխանցվել էր «Բալասանյան դաշինք»-ին, որը մեծամասնություն կազմեց ավագանիում, իսկ դաշինքը գլխավորող Սամվել Բալասանյանը վերընտրվեց Գյումրիի քաղաքապետ։ «Բարգավաճ Հայաստան» և «Հայկական վերածնունդ» կուսակցությունները հոկտեմբերի 11-ին հայց էին ներկայացրել դատարան՝ պահանջելով անվավեր ճանաչել թիվ 34 ԸԸՀ-ի կայացրած որոշումը և իրենց վերադարձնել այդ երկու մանդատները։
ԱԺ ՕԵԿ խմբակցության պատգամավոր Հովհաննես Մարգարյանը նիստից հետո լրագրողների հետ զրույցում նշեց. «Իմ պատկերացումներով, գոնե դատարանը պետք է դիմեր Սահմանադրական դատարան սահմանադրականությունը ճշտելու, սակայն դա չարվեց։ Մտածում էի, որ դատարանը կկանգնի ժողովրդի կողքին: Որոշում կայացնելիս սովորաբար ասում են՝ հանուն ՀՀ-ի: Բայց այդպես չէ: Ես չլսեցի, որ դատարանը որոշում կայացներ հանուն ՀՀ-ի:
Կա՛մ պետք է շարունակենք պայքարը, կա՛մ հուսալքված ժողովուրդը պետք է ավելի արագ լքի երկիրը, որովհետև չկա արդարություն: Մենք ընտրել ենք պայքարի ճանապարհը»:
Մանրամասները՝ տեսանյութում: