ԱԺ արտահերթ նիստում ԸՕ քննարկման ժամանակ իր ելույթում ՀԱԿ խմբակցության պատգամավեր Լևոն Զուրաբյանը նշեց, որ այս պահին փորձում են կյանքի կոչել մի համաձայնագիր, որը կայացել է իշխանության-ընդդիմության-ՀԿ-ների ակտիվ մասնակցությամբ. «Սա, ինչ ուզում եք ասեք, նախադեպը չունի նորանկախ ՀՀ պատմության մեջ: Սա էական առաջընթաց է ազատ, արդար ընտրություններ ունենալու ճանապարհին»:
Զուրաբյանի խոսքով՝ 4+4+4 ձևաչափով քննարկումների արդյունքում ձեռք բերված համաձայնագրի դերը հասկանալու համար պետք է հասկանալ ՀՀ-ում ձևավորված արատավոր երևույթը. «ՀՀ-ում ժողովուրդը իրականում այսօր իշխանություն չի ձևավորում, օտարված է սեփական պետության կողմից: Այսօր իշխանափոխություն ընտրությունների միջոցով անհնարին է: Սա է ամենամեծ խնդիրը, այլ ոչ թե ղարաբաղյան հակամարտությունը, հարևան պետությունների կողմից շրջափակված լինելը: Եթե լուծվի ազատ, արդար ընտրությունների հարցը, հենց այդ պահից սկսած կդադարի արտագաղթը: ՀՀ-ում մինչ օրս հնարավոր չէր ընտրությունների միջոցով իշխանափոխությունը. իշխանությունն ուներ կես միլիոն ձայների կեղծման ոսկե պաշար: ՀՀ-ում կա 1,3 միլիոն ընտրող, սակայն իշխանությունը շարունակում է պահել երկու միլիոնանոց ցուցակը, որը ներառում է երկրից դուսր գտնվողների, բացականերին, մահացածներին: Դա է պատճառը, որ մինչ օրս ստորագրված ընտրացուցակները որպես պետական գաղտնիք էին պահպանվում: Առաջարկված փոփոխությունների մեխը հենց սա է՝ դրանք կսքանավորվեն ու կհրապարակվեն ԿԸՀ կայքում»:
«2017թ. ԱԺ առաջիկա ընտրություններին շվարած ընտրակեղծարարների դուխը բարձրացնելու համար իշխանությունները հաստատեցին ԿԸՀ վարկաբեկված կազմը, և Գյումրիում, Վանաձորում անցկացրեցին ընտրակաշառքների բաժանման և ընտրակեղծարարության զինավարժություններ: Համաձայնագրի կիրառումը ՀՀ-ում դուռ է բացում իշխանափոխություն իրականացնելու ու լեգիտիմ իշխանություն ձևավորելու համար»,- նշեց. Լ. Զուրաբյանը:
Նրա խոսքով՝ 2017թ. սպասվող ընտրական ճակատամարտը լինելու է հետևյալի շուրջ՝ իշխանություններն ամեն ինչ անելու են, որ ընտրությունները վերածեն մաֆիոզ, կլանային, տեղական ազդեցությունների տակ գտնվող ու կենցաղային բնույթ ունեցող ընտրությունների. «Գաղափարախոսական ընդդիմության գործը պետք է լինի՝ վերածել իշխանություններին անվստահություն հայտնելու հանրաքվեի, ինչպես դա տեղի ունեցավ 2015թ. հանրաքվեի ժամանակ: Պայքարը կրելու է անհավասար բնույթ, սակայն իշխանությունը զրկված է լինելու իր վերջնական հաղթանակը ապահովելու ոսկե պաշարի իր երաշխիքից»:
Մանրամասները՝ տեսանյութում: