ՕԵԿ խմբակցության անդամ Հովհաննես Մարգարյանը ԱԺ արտահերթ նիստում, որտեղ շարունակվեցին ԸՕ-ում նոր փոփոխություններ կատարելու մասին նախագծի քննարկումները, իր ելույթում անդրադարձավ Գյումրիում անցկացված ՏԻՄ ընտրություններին, որին իր կուսակցությունը ևս մասնակցել է, և ինքն էլ գլխավորել է նախընտրական ցուցակը:
Ե՛վ ՏԻՄ ընտրությունների, և՛ ավագանու առաջին նիստի արդյունքները վրդովեցրել են պատգամավորին, երբ բոնուսների հաշվին Գյումրու քաղաքապետ վերընտրվեց Սամվել Բալասանյանը. «Մարդիկ լինում են նողկալի և առաքինի, մենք պաշտպանված չենք. չէի կարող պատկերացնել, որ ՏԻՄ ընտրություններից րոպեներ առաջ կարող էին նման լկտի ձեւով զրպարտել ինձ: Այդ մարդիկ պիտի պատասխան տան դատարանում ու դրամական տույժ կրեն: Արդեն սկսվել է այդ գործընթացը, ու շուտով ականատեսը կլինեք այդ դատավարության»:
«Դպրոցում հիշում եմ՝ պարզ թվաբանություն էինք անցնում, մեկը կար, չէր կարողանում տարրական հաշվարկն անել, ուսուցչուհին անընդհատ նկատողություն էր անում: Հիմա այդ տրամաբանությամբ այս նոր ԸՕ-ով հաշվեցին ու բաշխեցին ձայները, ընտրեցին մի քաղաքապետի: Այդպես չի լինում: Էլ բան չգտանք, հիմա էլ սա ենք մոգոնել՝ վերարտադրվելու համար: Եթե մինչ օրս շաբաթական երկու ավտոբուսով էին հեռանում գյումրեցիները, հիմա շատանալու են, քանի որ չկա արդարություն: Ես վստահեցնում եմ՝ Գյումրին լինելու է նախադեպ պայքարի, ու օրենքով թույլ տված բոլոր միջոցներով մենք պայքարելու ենք, որ տեր կանգնենք մեր քվեին:
Հոգևորականները մեկնաբանում են՝ ի՞նչ է մահը, դա նշանակում է մարդ՝ առանց հոգու: Հիմա մահացած է այս ԸՕ-ն, քանի որ Սահմանադրության ոգին այստեղ չկա
Ապրիլին այս ուխտը ձեր բոլորի դռներին չոքելու է… Գալու է ժամանակը, որ բոլորդ միանալու եք այս պայքարին, որովհետև այլ ելք չկա արդարությանը հասնելու համար»:
Մանրամասները՝ տեսանյութում:
