Շախմատի միջազգային վարպետ Արիաննա Կաոիլին բարեգործական շախմատային միաժամանակյա խաղի սեանս անցկացրեց շուրջ 22 խաղատախտակների վրա:
«Իհարկե, սա իմ գաղափարը չէ, սակայն ես մեծ սիրով միացա այս նախաձեռնությանը, քանի որ ինքս էլ մաս եմ կազմում Երևանի Ինթերնեյշնլ Ռոտարի Ակումբին»,- ասաց Արիաննան:
Երևանի հանրային այգիներից մեկը ներառական հանգստի բարեկարգ գոտու և խաղահրապարակի վերածելու նպատակով Երևանի Ինթերնեյշնլ Ռոտարի Ակումբը նախաձեռնել է «Երևանի Ռոտարի այգու-Yerevan Rotary Park» ծրագիրը:
Ծրագրով նախատեսվում է Քանաքեռ-Զեյթուն վարչական շրջանում գտնվող այգին վերանորոգել և ստեղծել համապատասխան խաղային պայմաններ, որոնցից հավասարապես կարող են օգտվել և՛ առողջ, և՛ հաշմանդամություն ունեցող երեխաները: Այգին կծառայի նաև մեծահասակների հանգստի համար:
Շախմատային խաղին որպես հովանավորներ մասնակցում էին ՀՀ-ում հավատարմագրված դեսպաններ, ՄԱԿ-ի հայաստանյան կառույցների և միջազգային այլ կազմակերպությունների ներկայացուցիչներ, գործարարներ, քաղաքական ու մշակութային գործիչներ: