«Yerevan Open 2016» շախմատային մրցաշարի գլխավոր մրցավար Աշոտ Վարդապետյանը վստահ է, որ անդրանիկ մրցաշարը շարունակական բնույթ կկրի:
«Երկար տարիներ մենք ուզում էինք, որ Երևանը ունենա իր բաց մրցաշարը: Լինելով առաջինը` այն որակապես բարձր մակարդակի վրա էր: Մենք լիահույս ենք, որ տարեցտարի մրցաշարն ավելի թափ կհավաքի: Այն իսկապես հաջող մրցաշար է: Երկար տարիներ միջազգային շախմատային ասպարեզում եմ, կարող եմ ասել, որ չեմ ամաչում այս մրցաշարի համար, քանի որ բարձր մակարդակի վրա էր: Վստահ եմ, որ հաջորդ տարիներին էլ այն նույնկերպ հաջող կլինի»,- ասաց Վարդապետյանը:
Անդրանիկ մրցաշարի հաղթող դարձավ Ռոբերտ Հովհաննիսյանը, ով, 9 հնարավորից վաստակելով 7 միավոր, լրացուցիչ միավորներով դարձավ չեմպիոն, քանի որ 7-ական միավոր ունեին նաև առաջին 8 տեղերը զբաղեցրած շախմատիստները: Երկրորդ տեղում Պավել Սմիրնովն էր, իսկ եռյակի վերջում՝ Վիտալի Բերնադսկին: Առաջին տարին անցկացվող մրցաշարին մասնակցում էին Ուկրաինայի, Ռուսաստանի, Նիդեռլանդների, Հնդկաստանի, Իսրայելի, Թուրքմենստանի, Բելառուսի, Չեխիայի և Իրանի շախմատիստները: Առաջնության մրցանակային ֆոնդը կազմում էր 16.000 ԱՄՆ դոլար:
