Կինոռեժիսոր Տիգրան Խզմալյանը իր մի խումբ համախոհների հետ որոշել է ստեղծել եվրոպական ուղղվածության կուսակցություն, որի պայմանական անվանումն է «Եվրոպական ընտրություն»:
Տիգրան Խզմալյանը չի կիսում այն կարծիքը, թե Հայաստանում կան 100-ից ավելի կուսակցություններ, և ուրեմն այս կուսակցության ստեղծումը ինքնանպատակ է:
«Թյուր է այդ կարծիքը. Հայաստանում կա ընդամենը 2 կուսակցություն՝ մեկը բազմանուն, մեծ, իշխող կուսակցությունն է, որտեղ կան նախկին և ներկայիս իշխանություններ, կուսակցություններ, որոնք երազում են ապագայում այդ լափամանին մոտենալ և դառնալ իշխանություն: Դրանց բոլորին կարելի է բնութագրել որպես մեկ կուսակցություն, որի հիմնական առանցքն այն է, որ նրանք ստեղծված են և վերահսկվում են ռուսական հատուկ ծառայությունների կողմից: Այսինքն՝ դրանք կայսերապաշտ են և ծառայում են կայսրությանը: Երկրորդ կուսակցությունների խումբը շատ փոքր է, որոնք Հայաստանի համար փնտրում են նոր ուղի»,- «Առաջին լրատվական»-ի հետ զրույցում նշեց Տիգրան Խզմալյանը:
Նրա համոզմամբ՝ այդ նոր ուղղությունը եվրոպականն է՝ Հայաստանը պետք է դառնա Եվրամիության, ՆԱՏՕ-ի անդամ, Հայաստանը կարիք ունի «եվրոռեմոնտի»:
Մեր զրուցակիցը նշեց, որ եթե իրենց խումբը հասցնի դառնալ կուսակցություն և գրանցվել, ապա կմասնակցի 2017-ի ընտրություններին, «որովհետև օրեցօր փոխվում է իրավիճակը՝ ոչ թե Հայաստանում, այլ Ռուսաստանում»:
