ՀՀ Նախագահ, Հայաստանի շախմատային ֆեդերացիայի նախագահ Սերժ Սարգսյանը Երևանի քաղաքապետ, Երևանի շախմատի ֆեդերացիայի նախագահ Տարոն Մարգարյանի և Եվրոպայի շախմատի միության նախագահ Զուրաբ Ազմայպարաշվիլիի հետ միասին Հայաստանի շախմատի ակադեմիայում ներկա է գտնվել ս.թ. հոկտեմբերի 1-ից 10-ը Հայաստանում առաջին անգամ անցկացվող Երևանի շախմատի միջազգային բաց մրցաշարի՝ «Երևան օփեն»-ի մեկնարկին: Միջազգային մրցաշարի մեկնարկի առիթով ներկաներին ուղղված ողջույնի խոսքում Տարոն Մարգարյանը հաջողություններ է մաղթել մրցաշարի մասնակիցներին՝ նկատելով, որ քաղաքամայր Երևանի համար իսկապես պատվաբեր և սպասված է միջազգային նման մրցաշարի անցկացումը:
«Երևանում բազմաթիվ են միջազգային փառատոներն ու կրթական օլիմպիադաները, մրցույթներն ու առաջնությունները: Սակայն շախմատի այսքան պատվաբեր և սպասված միջազգային մրցաշարերն ու առաջնություններն իրենց ուրույն տեղն ունեն: Ձեզանից շատերն են Երևանում մասնակցել մրցաշարերի և հիշում են Երևանում կայացած աշխարհի 9-րդ չեմպիոն Տիգրան Պետրոսյանին նվիրված Եվրոպայի շախմատի անհատական 15-րդ առաջնությունը: Այսօր էլ Երևանը սիրով հյուրընկալել է ձեզ՝ Երևանի շախմատի միջազգային բաց առաջնության մասնակիցներիդ, մաղթելով հաջողություններ և բացառիկ արդյունքներ: Շախմատը մեզանում խիստ մասսայականացված է: Ինչպես գիտեք այն առանձին առարկա է նաև մեր դպրոցներում, և շատ ու շատ երկրների համար մեր փորձը դարձել է օրինակելի: Բազմաթիվ են շախմատի մասնագիտացված դպրոցները, ուստի նաև հաճելիորեն առատ են ամենատարբեր տարիքային խմբերի առաջնություններն ու միջազգային խաղերը: Սիրելի մասնակիցներ, բարով եք եկել Երևան: Խաղերից զատ, վայելեք նաև արևային ու ջերմ մեր քաղաքը: Վստահ եմ, որ առաջին անգամ Երևանում գտնվողները, կրկին գալու են այստեղ` արդեն որպես բարեկամ: Եվ համոզված եղեք, որ մեր քաղաքը միշտ պատրաստ է ընդունելու բարեկամներին»,- ընդգծել է քաղաքապետն ու «Երևան օփեն» միջազգային առաջին մրցաշարը հայտարարել բացված:
Հարկ է նշել, որ մրցաշարին մասնակցելու հայտ են ներկայացրել 11 երկրի 140 շախմատիստներ, որոնց թվում՝ 23 միջազգային գրոսմայստեր և 9 միջազգային վարպետ:
