Թուրքական Sabah թերթի փոխանցմամբ՝ Թուրքիայի զինված ուժերը ԱՄՆ-ից ստացել են Chinook CH-47F տիպի ռազմափոխադրման երկրորդ ուղղաթիռը։ Այդ ուղղաթիռները հայտնի են որպես «թռչող ամրոցներ»։
Chinook CH-47F տիպի ռազմափոխադրման առաջին ուղղաթիռը թուրքական կողմին հանձնվել է մարտին, այն փորձարկումներ է սկսել հուլիսին, ինչից հետո հանձնվել է Իզմիրում բազավորված թուրք օդաչուներին։
Նոյեմբերին թուրքական կողմը կստանա Boeing ընկերության արտադրության երրորդ ուղղաթիռը, իսկ ընդհանուր առմամբ ստանալու է 6 ուղղաթիռ։ Ծրագրվում է, որ դա տեղի կունենա մինչև 2018 թվականը, ինչից հետո կմեկնարկի երկրորդ փաթեթի իրագործումը, որն առնչվում է 5 ուղղաթիռների մատակարարմանը։
Դրանցից 4-ը մատակարարվելու է հատուկ նշանակության զորքերին, իսկ 1-ը՝ պաշտպանության նախարարությանը։ CH-47 Chinook ուղղաթիռն ունակ է միաժամանակ տեղափոխել լավ սպառազինված 55 զինվորի։