Նյու Յորքի իշխանությունները որոշում են կայացրել ոստիկանների համար գնել 1000 կրելի տեսախցիկներ՝ ավելի քան 6 միլիոն դոլար արժողությամբ: Այս մասին հայտնում է New York Daily News-ը՝ հղում անելով ոստիկանությանը:
Ինչպես հայտնում է պարբերականը` կրելի տեսախցիկների համար հինգ տարվա ընթացքում քաղաքի իշխանությունները կտրամադրեն 6 միլիոն 425 հազար դոլար: Դրանք կօգտագործեն, այսպես կոչված, «ամպային պահուստը» նկարահանված նյութերի համար:
«Մեզ համար դա լավ իր է: Այժմ դուք հնարավորություն կունենաք տեսնելու նրանց աշխատանքը՝ թե ինչպես են նրանք հետևել հրահանգներին, որտեղ են նրանք սխալներ գործել, ինչը այնպես չի գնացել, ինչն է հաջողվել»,- ասել է ոստիկանության կոմիսարի առաջին տեղակալ Բենջամին Թակերը:
Նշված միջոցառումն ընդունվել է անզեն աֆրոամերիկացիներին ոստիկանների կողմից սպանելու դեպքերի նկատմամբ արձագանքների ֆոնին և նպաստում է ոստիկանների գործողությունների վերահսկման ուժեղացմանը՝ նշում է պարբերականը: Փորձագետները հույս ունեն, որ դա կօգնի մեծացնել ոստիկանության և հասարակության միջև վստահության մակարդակը:
