ԱՄՆ պետքարտուղար Ջոն Քերին ափսոսանք է հայտնել, որ չի կարողացել պայմանավորվել ԱՄՆ նախագահ Բարաք Օբամայի վարչակազմի հետ այն մասին, որ սիրիական ճգնաժամի կարգավորման հարցով դիվանագիտական ջանքերը պետք է ամրապնդվեն ուժի կիրառման իրական սպառնալիքով: Նա նաև հայտարարել է, որ Ռուսաստանի դիվանագետները «խորամանկել են»: Այս մասին հայտնում է The New York Times-ը՝ հղում անելով Նյու Յորքում ՄԱԿ-ի Գլխավոր ասամբլեայի 71-րդ նստաշրջանի շրջանակներում Սիրիայի քաղաքացիական հասարակության ներկայացուցիչների հետ Քերիի հանդիպման ձայնագրության հատվածներին:
Քերին նշել է, որ Օբամայի վարչակազմում կան 3-4 մարդ, որոնք նույնպես պնդում են ուժի կիրառման հարցում:
«Իսկ ես սպառեցի փաստարկները: Ես հանդես եկա ուժի կիրառման օգտին, սակայն ամեն ինչ այլ կերպ դասավորվեց: Մենք փորձում ենք զբաղվել դիվանագիտությամբ, և ես հասկանում եմ՝ դա ձեզ վշտացնում է: Ոչ ոք այնպես հիասթափված չէ, որքան մենք»,- ասել է նա:
Ավելի վաղ Քերին չէր բացառել Սիրիայի նախագահ Բաշար Ասադի մասնակցությունը երկրում նախագահական հաջորդ ընտրություններին: