Իտալիայի Ձապոնետա քաղաքի բյուջեն թույլ չի տալիս ձեռք բերել դպրոցական ավտոբուս, այդ պատճառով քաղաքապետը որոշում է կայացրել երեխաներին դպրոց ուղեկցելու պատասխանատվությունը վերցնել իր վրա:
La Stampa պարբերականին տված հարցազրույցում քաղաքապետ Վինչենցո Դալոիզիոն ասել է. «Մենք ունենք 11 միլիոն եվրո պարտք, որից 10 միլիոնը հիփոթեքային է, որը պետք է վճարել մինչև 2040 թվականը: Մենք տարեկան 700 հազար եվրո վճար ենք մուծում, իսկ մեր ընդհանուր քաղաքային բյուջեն հազիվ հասնում է 2 միլիոն եվրոյի»:
Ձապոնետան փոքր քաղաք է, որտեղ ապրում են 3400 բնակիչ: Փոքր բյուջեի պատճառով քաղաքապետարանը չի կարողանում գնել դպրոցական ավտոբուս: Այդ պատճառով քաղաքապետը իրադրությունը վերցրել է իր ձեռքը: Նա ամեն առավոտ դպրոցականներին և մանկապարտեզի երեխաներին վերցնում է իրենց տներից և անձամբ ուղեկցում դպրոց: