«Պետությունը ամբողջովին, այսպես ասած, արդեն ճաք է տալիս կարերից և որևէ ձևով այլևս հնարավոր չէ պահել այն կառավարման համակարգը, որով մինչև հիմա գործել են, որովհետև այն ռեսուրսազրկել է ամբողջովին և ինքն էլ է ռեսուրսազրկվել»,- ««Սասնա ծռեր՝ իրավունքի ու բռնության սահմանները» լուսանկարչական աշխատանքների ցուցահանդեսին լրագրողների հետ զրույցում ասաց «Ժառանգություն» կուսակցության փոխնախագահ Արմեն Մարտիրոսյանը:
Նրա խոսքով՝ այս լուսանկարներում մենք տեսնում ենք մեր հասարակության որոշում կայացնող հիմնական զանգվածին՝ 25-50 տարեկանների. «Նրանց դեմքերին ամբողջովին խաղաղություն է և պայքարի կամք»:
Ինչպես նկատեց Արմեն Մարտիրոսյանը՝ այսպիսի քաղաքացիներ ունենալու դեպքում մենք ուղղակի իրավունք չունենք անհաջողության մատնվելու, «և ուզենք, թե ոչ՝ պայքարը պետք է շարունակենք»:
Դիտարկմանը՝ այս լուսանկարները ապացույցն են այն բանի, որ անմեղ մարդիկ գտնվում են կալանքի տակ, Ա. Մարտիրոսյանը արձագանքեց. «Ցավոք, մեր իրավապահ մարմինները դեռևս իշխանությունների կամարտահայտությունը իրականացնող օրգաններ են: Իրավապահ մարմինները իրականացրել են ոչ թե իրավունքի գերակայության գործառույթ, այլ գործադիր իշխանության, նախագահականի հրամայականի գործառույթ»: Այնուամենայնիվ, նա հույս հայտնեց, որ գալու է այն օրը, երբ ոստիկանը լինելու է ժողովրդի ծառան:
«Ժառանգության» փոխնախագահի խոսքով՝ «Սասնա ծռերի» գործով գնում է ոչ թե իրավական, այլ քաղաքական գործընթաց. «Բայց հույս ունեմ, որ մենք երկրի ընթացքը կփոխենք, և Հայաստանում կիշխի օրինականությունը»:
