ՀՀ ԱԺ բոլոր 131 պատգամավորների դրամական միջոցները 2015 թվականին կազմել է շուրջ 90 մլն դոլար: Ազգային ժողովում կան 16 դոլարային միլոնատերեր: Այս մասին այսօր լրագրողների հետ հանդիպմանը հայտարարեց ԱԺ մոնիտորինգ ծրագրի փորձագետ Բաբկեն Թունյանը:
Այսպիսով, 2015թ. վերջին շատ դրամական միջոցներ հայտարարագրած պատգամավորների ցանկում առաջին տեղում է Գագիկ Ծառուկյանը, նա հայտարարագրել է 16,6 մլրդ դրամ, որը համարժեք է 34,3 մլն ԱՄՆ դոլարի, ընդ որում Գագիկ Ծառուկյանի դրամական միջոցները 2015-ին կտրուկ պակասել են մոտավորապես 100 մլն դոլարով, միևնույն ժամանակ աճել են նրա կողմից ձեռքբերված արժեթղթերը:
Երկրոդ տեղում է Սամվել Ալեքսանյանը նշված ժամանակահատվածում նա հայտարարագրել է 8,8 մլն դոլարի համարժեք դրամական միջոցներ: Ըստ ԱԺ մոնիտորինգ ծրագրի՝ պատգամավորի կնոջ դրամական միջոցներն ավելի շատ են:
Երրորդ տեղում պատգամավոր Գրիգորի Մարգարյանն է. նա հայտարարագրել է 5,1 մլն դոլար համարժեք դրամ:
Բաբկեն Թունյանի խոսքով՝ ընդհանուր առմամբ Ազգային ժողովում կան 16 դոլարային միլոնատերեր. «Նկատի ունենք միայն դրամական միջոցները, փողերը, որոնք պահվում են բանկային հաշիվներին, դոշակի տակ կամ սեյֆում:
2015թ. եկամուտների մասով էլ Գագիկ Ծառուկյանը զբաղեցնում է առաջին հորիզոնականը, նա ունեցել է 6.3 մլրդ դրամ եկամուտ, երկրորդ տեղում է Աշոտ Արսենյանը՝ 6 մլրդ դրամ, այդ ցանկում են նաև պատգամավորներ Գուրգեն Արսենյանը, Արկադի Համբարձումյանը, Մհեր Սեդրակյանը, Արայիկ Գրիգորյանը, իսկ տասնյակը եզրափակում է Մանվել Գրիգորյանը, ով ունեցել է 157.3 մլն դրամի եկամուտ:
Այսպիսով՝ ԱԺ բոլոր 131 պատգամավորները միասին 2015թ. վերջին ունեցել են 12,5 մլրդ դրամ, 47,7 մլն դոլար և 15,3 մլն եվրո, կան պատգամավորներ ովքեր հայտարարագրել են ռուսական ռուբլի և շվեցարական ֆրանկ, բայց դա չնչին տոկոս է կազմում:
ՀՀ ԱԺ բոլոր 131 պատգամավորների դրամական միջոցները 2015 թվականին կազմել է շուրջ 90 մլն դոլար, պատգամավորների կողմից դրամական միջոցների հայտարարագրված թիվը նվազել է, ընդ որում այդ թվի նվազումը պայմանավորված է հենց Գագիկ Ծառուկյանի դրամական միջոցների նվազմամբ, քանի որ նրա դրամական միջոցները ընդհանուր թվի 30 տոկոսն է կազմում:
Մանրամասները՝ տեսանյութում: