«Մի քանի հանգամանքների բերումով այս ընտրություններն առանձնահատուկ են. առաջին անգամ համամասնական ընտրակարգով քաղաքն ընտրում է ավագանի, առաջին անգամ քաղաքը չի ընտրելու քաղաքապետ, քաղաքապետն ընտրվելու է ավագանուց և հաշվետու է լինելու ավագանուն: Մի քանի թեկնածուներ խորամանկության են դիմում, փորձում են իրենց անձը առաջ մղել և ներկայանում են որպես քաղաքապետի թեկնածու, կոչ են անում քվեարկել քաղաքապետի թեկնածուի օգտին, այնինչ իրականում շատ քաղաքացիներ զարմանալու են, երբ գնան ընտրատեղամաս, բացեն քվեաթերթիկը և տեսնեն, որ այնտեղ քաղաքապետի թեկնածուի անուն-ազգանուններ չկան, այլ նշված են քաղաքական ուժերի անուներ»,- Առաջին լրատվականին անդրադառնալով առջիկայում Գյումրիում սպասվող ՏԻՄ ընտրություններին ասաց Գյումրու ավագանու անդամության թեկնածում, « Ասպարեզ» օրաթերթի խմբագիր Լևոն Բարսեղյանը:
Նրա խոսքով՝ ՀՀԿ-ն ոչ մի կերպ չի ուզում, որ իր անունը քարոզարշավի ընթացքում երևա, ավելի շատ շեշտը դնում են գործող քաղաքապետի անձի վրա, քան թե քաղաքական ուժերի վրա, որոնք միավորվել և դաշինք են կազմել. «Երևի կռահում են, որ «Հանրապեականի» անունը շատ տալը կամ որևէ անգամ տալն այստեղ վնասում է իրենց ցուցակի հնարավորություններին»:
Լևոն Բարսեղյանի դիտարկմամբ՝ այս ընտրությունների մյուս առանձնահատկությունն այն է, որ սա նախորդում է ԱԺ-ի ընտրություններին, և սրանով անուղղակիորեն մեկնարկում է խորհրդարանական ընտրությունների քարոզարշավը Գյումրիում: Խմբագրի կարծիքով՝ կան կուսակցություններ, որոնք այս ընտրությամբ փորձում են մարդկանց հիշողությունը թարմացնել իրենց մասին, ստանալ քվեներ, դիվիդենտներ շահել: Նրա խոսքով՝ նախկինում քաղաքական ուժերի ուշադրությունը սևեռված էր հիմնականում համապետական ընտրությունների վրա:
Հարցին, թե արդյո՞ք Բալասանյանին ընդդիմադիր քաղաքապետի ռեալ թեկնածու կա՞ Գյումրիում, Լևոն Բարսեղյանը պատասխանեց, որ իշխանական տարածված հնարք կա. հարցադրում են անում, որ եթե իրենց թեկնածուն չլինի, ո՞վ կլինի. «Ասում էին՝ եթե Լ. Տեր-Պետրոսյանը չլինի, բա ո՞վ է լինելու, եթե Ռ. Քոչարյանը չլինի ո՞վ է լինելու… Եթե ոմանց թվում է, որ քաղաքային տնտեսությունը կառավարելը բարդ է, խոր մոլորության մեջ են նրանք: Մեր օրերում չկա այնպիսի մի երևելի բարդություն, որ մեր մասնագետներով, գործընկերներով անհնար լինի հաղթահարել այս ոլորտում: Բոլոր կուսակցությունների ցանկերի առաջին համարներում մարդիկ կան, ովքեր բանիմաց են, զանազան տնտեսություններ են կառավարել: Բալասանյանը քաղաք կառավարելու փորձ ունե՞ր, որ եկավ կառավարելու, չուներ: Քաղաք կառավարելը հերոսացում չի պահանջում, հարկավոր է արդար լինել, գիտելիք ունենալ, իսկ գիտելիք չունենալու դեպքում գոնե իմանալ, թե ովքեր են գիտելիք ունեցողները և այդ մարդկանց ներքաշել, համայնքի կառավարման մեջ մասնակից դարձնել: Կարիք չկա սարքել ապոկալիպտիկ ողբերգություն»:
Մանրամասները՝ տեսանյութում:
