«Կոլումբիայի հեղափոխական զինված ուժեր» (FARC) ապստամբական խմբավորումը, չսպասելով իշխանությունների հետ խաղաղ համաձայնագրի հարցով հանրաքվեի արդյունքներին, սկսել է հանձնել զենքը ՄԱԿ-ի առաքելությանը, որը զբաղվում է երկրում կրակի դադարեցման ռեժիմի պահպանման մոնիտորինգով։ Այս մասին հայտնում է TASS գործակալությունը՝ հղում անելով խաղաղության հարցերով Կոլումբիայի գերագույն հանձնակատար Սերխիո Խարամիլիոյին։
«Գործընթացն արդեն սկսվել է, և ՄԱԿ-ի առաքելությունը կիրազեկի մեզ զինաթափման ընթացքի մասին»,- ասել է Խարամիլիոն՝ հստակեցնելով, որ ապստամաբները սկսել են հանձնել զենք-զինամթերքը։
Սեպտեմբերի 27-ին Կոլումբիայի նախագահ Խուան Մանուել Սանտոսը և խմբավորման ղեկավար Ռոդրիգո Լոնդոնիո Էչևերին ստորագրել էին համաձայնագիր կեսդարյա զինված հակամարտության դադարեցման և կայուն խաղաղության ապահովման մասին։ Ձեռք բերված պայմանավորվածությունների համաձայն՝ հոկտեմբերի 2-ին հանրապետությունում կանցկացվի համազգային հանրաքվե, որն անհրաժեշտ է ապստամբական խմբավորման հետ կառավարության խաղաղ համաձայնագիրն օրենսդրորեն ամրապնդելու համար։
Զինված հակամարտությունը սկսվել է 1960-ականներին և մինչ օրս խլել ավելի քան 200 հազար մարդու կյանք։