«Կանաչների» կուսակցությունից ԱՄՆ նախագահի թեկնածու Ջիլ Սթայնը անհարմար վիճակում է հայտնվել՝ Twitter-ում ծաղրելով իր մրցակից լիբերտարիանական Գերի Ջոնսոնին, որը նախօրեին հարցազրույցի ժամանակ չի կարողացել նշել ոչ մի համաշխարհային ղեկավարի անուն, որին համակրում է:
Սթայնը Ջոնսոնին ծաղրել է համաշխարհային ղեկավարներին չճանաչելու համար, բայց ինքն էլ ոչ ճիշտ է պատասխանել Ջոնսոնին տրված հարցին:
«Ահա ղեկավարներից ոմանք, որոնք ինձ ամենաշատն են դուր գալիս՝ Էլիզաբեթ Մեյ, Ժուաու Սթեդիլե և Ջերեմի Քորբին»,- գրել է Սթայնը Twitter-ում և կցել է #AleppoMoment թեգը, որն ակնարկում է Ջոնսոնի նախորդ վրիպումը հարցազրույցի ժամանակ, երբ Ջոնսոնը խոստովանել էր, որ չգիտի՝ ինչ է Հալեպը:
Սակայն Սթայնի թված գործիչերից ոչ մեկը համաշխարհային առաջնորդ կամ պետության ղեկավար չէ: Էլիզաբեթ Մեյը Կանադայի «Կանաչ» կուսակցության ղեկավարն է, գրող և իրավաբան: Ժուաու Սթեդիլեն բրազիլացի տնտեսագետ է, Անհող գյուղացիների հասարակական շարժման համահիմնադիր: Ջերեմի Քորբինը բրիտանացի քաղաքական գործիչ է, ընդդիմադիր Լեյբորիստական կուսակցության ղեկավարը: