ԱՄՆ նախագահի դեմոկրատ թեկնածու Հիլարի Քլինթոնը մեղադրել է իր մրցակից Դոնալդ Թրամփին ամերիկյան օրենսդրության խախտման համար:
Պատճառ է դարձել հետաքննությունը, որն անցկացրել է Newsweek պարբերականը։ Այնտեղ ասվում է, որ Թրամփի ղեկավարած ընկերություններն իբրև թե գաղտնի բիզնես են վարել Կուբայում մի ժամանակահատվածում, երբ դա արգելված էր ամերիկյան օրենսդրությամբ Ֆիդել Կաստրոյի ռեժիմի դեմ սահմանված պատժամիջոցների պատճառով։ Այս մասին հայտնում է BBC-ն։
Քլինթոնի խոսքով՝ Թրամփի գործողություները ցույց են տալիս, որ նա իր գործարար ու անձնական շահերը վեր է դասում ԱՄՆ օրենքներից ու արժեքներից իր կողմից անցկացվող քաղաքականությամբ։
Խոսքը Trump Hotels & Casino Resorts ընկերության մասին է, որի ներկայացուցիչները, պարբերականի տվյալներով, 1998 թվականին մոտ 68 հազար դոլար է ծախսել Կուբա այցի համար։
Այդ ժամանակ ամերիկյան ընկերություններին արգելված էր առանց հատուկ թույլտվության գումար ծախսել կղզում։ Թրամփի նախկին աշխատողներրից մեկը հայտարարել է, որ ուղևորության նպատակը համագործակցության բազա ստեղծելն էր Վաշինգտոնի կողմից պատժամիջոցների մեղմացման կամ վերացման դեպքում։
Թրամփի ընտրական շտաբի ներկայացուցիչը հայտարարել է, որ գումարներ ծախսվել են, սակայն Թրամփն այդ ժամանակ որոշել է ներդրում չանել կղզի-պետության տնտեսությունում։