«Նոյյան Տապան» լրատվական գործակալության մամուլի այսօր հրավիրվել էր ՏԻՄ ընտրություններում Կոտայքի մարզի Գառնի համայնքում որպես գյուղապետի թեկնածու առաջադրված՝ Ազատ գետի անխոչընդոտ հոսքի համար պայքարող անկուսակցական Արուսյակ Այվազյանի և նրա վստահված անձանցից Գրիզելդա Ղազարյանի ու Արմինե Պետրոսյանի ասուլիսը։ Համայնքի ղեկավարի ընտրություն այս համայնքում տեղի կունենա հոկտեմբերի 2-ին:
Գառնի համայնքի գյուղապետի թեկնածու, անկուսակցական Արուսյակ Այվազյանը նշեց. «Ես կառաջնորդվեմ իմ համայնքի ձայնով: Մտածելով, որ մեր տեղական մարմինները չեն կարողանում դիմակայել իշխանությանը ենթարկվելու արհավիրքին`ասացի` գուցե մենք փորձենք, ուստի որոշեցի առաջադրվել, ու եթե դառնամ համայնքի ղեկավար, ոչ թե կլինեմ ղեկավար մարմինների կամակատարը, այլ կառաջնորդվեմ իմ համայնքի ձայնով»:
Ա. Այվազյանի խոսքով՝ բազում խնդիրներ կան համայնքում և նախ սկսելու են գառնեցիների խմելու ջրի հիմնախնդրից. «Գառնին հարուստ է խմելու ջրով, բայց մարդիկ այժմ օրերով, ամիսներով մնում են առանց խմելու ջրի: Նախ այդ խնդրին ենք լուծում տալու: Հետո զբաղվելու ենք ոռոգման ջրի հարցով, մարդկանց ապահովելու ենք որակյալ բժշկական ծառայություններով»:
