ՀՀ կառավարության անդամների մեծ մասն արդեն նշանակված է՝ բացառությամբ արտաքին գործերի և պաշտպանության գերատեսչությունների ղեկավարների: Ինչո՞վ է պայմանավորված այս նշանակումների հապաղումը, պատճառը Հայաստանո՞ւմ է, թե՞ Հայաստանից դուրս: ԱԺ պատգամավոր Թևան Պողոսյանն այս առնչությամբ «Առաջին լրատվական»-ի հետ զրույցում ասաց, որ ինքը դավադրությունների տեսության սիրահար չէ:
«Եթե որոշեին դրսից նշանակել, արդեն անունն ասած կլինեին: Հազիվ թե դուրսը տարբեր խաղեր հանդուրժի: Այստեղ, կարծում եմ, ավելի շատ ներքին խնդիր կա»,- ասաց նա՝ հավելելով, որ շատ բան կախված է նրանից, թե ով է լինելու արտաքին գործերի նախարարը և ինչ քաղաքականություն է վարելու:
Ինչ վերաբերում է կառավարության նոր կազմին, Թևան Պողոսյանը նկատեց, որ թեև խոսվում է համակարգային փոփոխությունների տեսլականների մասին, միևնույն է՝ արդյունքի առումով քայլերը դեռ անորոշ են. «Ու այդ անհայտության մեջ թվում է, որ շատ բաներ նույնն են մնալու: Սիրուն խոսքերից բացի՝ մենք պետք է տեսնենք գործողություններ»:
«Տեխնոկրատները լավ են, երբ ձևավորված է տեսլականը, և իրենք փորձում են մենեջմենթի իմաստով կյանքի կոչել: Մի կողմից ասվում է՝ դուք քաղաքական չեք, պրոֆեսիոնալներ եք, մյուս կողմից ասվում է՝ քաղաքական երազանքը պետք է մեջը լինի»,- նշեց մեր զրուցակիցը՝ հարցադրում անելով, թե ո՞վ է այդ երազանքը ձևակերպելու:
Թևան Պողոսյանը հիշեցրեց Արմեն Դարբինյանի տեխնոկրատների կառավարության մասին, որը շատ թույլ վիճակում հայտնվեց, որովհետև քաղաքական հենարան չուներ: Նրա խոսքով՝ այդպես եղավ նաև Տիգրան Սարգսյանի օրոք. «Եվ բոլորը դարձան Հանրապետական կուսակցության անդամ»:
Հարցին՝ որքանո՞վ կարող են տեխնոկրատները պայքարել քրեաօլիգարխիայի դեմ, ԱԺ պատգամավորը նկատեց. «Երբ վարչապետը խոսում է համակարգային փոփոխությունների մասին, պետք է հասկանալ, որ բախումները անխուսափելի են: Մինչև հին կապերը չքանդենք, նորերը հնարավոր չի լինի ձևավորել: Այստեղ է խնդիրը՝ արդյոք քայլ կանե՞ն, թե՞ ոչ: Արդյոք կսկսե՞ն հասկանալ, որ դա միայն նախարարների փոփոխության մեջ չէ»:
Թևան Պողոսյանը անհեթեթ է համարում անցյալը մոռանալու մասին հայտարարությունը. «Եթե բոլոր խնդիրները այդտեղ են գտնվում, բա ի՞նչն ենք մենք շարունակելու: Ի՞նչն ենք զյոյից սկսելու՝ այս Հայաստանը թողնելու ենք այն կողմ, նոր Հայաստա՞ն ենք ձևավորելու»:
Կարևորագույն խնդիրն այն է, թե իրենք սիրո՞ւմ են երկիրը, իրենց համար ավելի կարևոր է երկի՞րը, թե՞ իրենց վերարտադրությունը՝ նկատեց մեր զրուցակիցը. «Եթե փորձում են իսկապես փոփոխություններ կատարել, ապա առաջիկա շաբաթում մենք պետք է շատ պաշտոնանկությունների մասին լսենք, իսկ այս տեսակի պետական ապարատը Հայաստանի համար շռայլություն է՝ մանավանդ, երբ մենք գնում ենք բյուջեի խստացման: Պետք է քայլ առ քայլ հասնել բուրգին»:
Թևան Պողոսյանի կարծիքով՝ վարչապետի առաջին խնդիրներից մեկը պետք է լինի առնվազն մեկ անգամ հոկտեմբերի 2-ին ազատ և արդար ընտրություններ անցկացնելու մասին բարձրաձայնելը: