NTV հեռուստաալիքով հաջողությամբ ցուցադրված «Տեսնում եմ՝ գիտեմ» սերիալի հետաքրքրաշարժ գաղափարի հեղինակն ու պրոդյուսերը Վիկտոր Սողոմոնյանն է՝ քաղաքական գիտությունների դոկտոր, ով մասնագիտորեն ուսումնասիրում է հաղորդակցական խնդիրները։ Նա 7days.ru առցանց պորտալի հետ զրույցում պատմել է, թե ինչպես են առաջացել սյուժեի անսպասելի շրջադարձերը, ինչպես են գլխավոր հերոսուհուն սովորեցրել օգտագործել շնորհը, և ինչու են նրան բաժանել ամուսնուց։
Հարցին այն մասին, թե նրան հաջողվե՞լ է մասնակցել գրական սցենարի ստեղծմանը, Վիկտոր Սողոմոնյանը նշել է, որ չնայած ապրում է Երևանում, բայց հաճախ լինում է Մոսկվայում, սակայն ժամանակակից տեխնիկական միջոցները թույլ են տվել իրեն լիովին մասնակցել ֆիլմի ստեղծման գործընթացին, այդ թվում՝ սցենարի գրմանը։ «Լեոնիդ Կորինի գլխավորությամբ սցենարիստների հետ մենք քննարկել ենք յուրաքանչյուր սերիայի սյուժեի շրջադարձերը։ Մեր ամենակարևոր հանձնարարությունն էր ստանալ դետեկտիվ պատմություններ՝ անսովոր կառուցվածքով ու ավարտով»,-ասել է նա։ Հերոսուհին օժտված է մյուսներից ավելին տեսնելու անբացատրելի շնորհով, որը նա ձեռք էր բերել անհայտ դեղամիջոցի ներարկումից հետո, որը մշակել էր նրա դեղագործ հայրը։ Եթե նրա շնորհը չլիներ, նա ավելի երկար ուղի կանցներ։ Օրինակ՝ սերիանրից մեկում նա կարողանում է միանգամից գլխի ընկնել, որ երեք գողությունների հեղինակը նույն անձն է։
Լրագրողի այն դիտարկմանը, թե շատերը կերազեին առաջին հայացքից ճանաչել մարդկանց, Վիկտոր Սողոմոնյանն ի պատասխան նշել է, որ շփման իր սեփական պրակտիկայում առաջին զգացողությունները գրեթե միշտ եղել են ամենահավաստին, գործում է կամ ինքնապաշպանական համակարգը, կամ ինքնաներկայանալու համակարգը։ Իսկ ահա հաջորդական հանդիպումներին մարդն արդեն կարող է փակ լինել, ասել է նա։
Լրագրողը զարմանք է արտահայտել Սողոմոնյանի ճակատագրի շրջադարձերի վերաբերյալ, սկզբում Սողոմոնյանը մասնակցել է ՈՒՀԱ-ի հայկական լիգային, զբաղվել քաղաքական հեռուստալրագրությամբ, եղել ՀՀ նախագահ Ռոբերտ Քոչարյանի մամլո քարտուղար, խորասուզվել գիտության մեջ և ահա դարձել հաջողակ հեռուստասերիալի պրոդյուսեր։
«Եթե վաղը ես հարազատներիս ու ընկերներիս ասեմ, որ որոշել եմ զբաղվել ֆիզիկայով, ոչ ոք չի զարմանա, ես ձեզ վստահեցնում եմ։ Հայտնի բրիտանացի գիտնականները մի քանի տարի առաջ հայտնաբերել էին, որ մարդու օրգանիզմը արտադրում է հաճույքի հորմոն ստեղծագործելու, ինչ-որ նոր բան ստեղծելու, բացահայտման պահին։ Հավանաբար գաղտնիքը դրանումն է։ Պետք է լինեն նաև համապատասխան պայմաններ և հնարավորություններ։ Իսկ դրանք, բարեբախտաբար՝ ունեմ. Ռոբերտ Սեդրակովիչը մշապես խրախուսել և այժմ խրախուսում է իմ գիտական ու ստեղծագործական գործունեությունը, ընտանիքս ըմբռնումով է վերաբերվում իր պարբերաբար կրկնվող աշխատանքային «հանգստյան օրերին»։ Եվ բոլոր ընկերները, այդ թվում՝ Մոսկվայի, շարունակում են սրտի թրթիռով վերաբերվել իմ բազմազան ստեղծագործական գաղափարներին։ Մի անգամ ես պատմել եմ նրան Ժաննա անունով աղջկա պատմությունը և անմիջապես ստացել այդ գաղափարը իրագործելու առաջարկ»։
«Աշխարհը փոխվում է, հասարակության մեջ ձևավորվում են միջանձնային հաղորդակցության նոր կարծրատիպեր։ Եվ այդ իմաստով շատ կարևոր է էկրանից հեռարձակվող ուղերձը. մարդը պետք է ավելի ուշադիր նայի և խորհի դիմացինի մասին։ Այլապես մենք, նույնիսկ խոսելով նույն լեզվով, դադարում ենք հասկանալ միմյանց։ Իսկ դա կարող է հանգեցնել Բաբելոնի աշտարակի մասին հայտնի բիբլիական պատմությանը»։
«Ես մեծ բավականություն եմ ստացել դեբյուտային աշխատանքից, և իհարկե, ցանկանում եմ ինչ-որ նոր բան անել։ Ի դեպ, հեռուստաալիքի հետ նոր նախագծերի քննարկում արդեն ընթանում է»,- ասել է Վիկտոր Սողոմոնյանը։
